لندن(این این آئی) برطانیہ میں غیر تربیت یافتہ پائلٹ کے جہاز لے کر اڑان بھرنے پر حکام میں کھلبلی مچ گئی جس پر طیارے کوفوری طور پر واپس بلا لیا گیا ،خوش قسمتی سے جہاز کسی بھی حادثے سے محفوظ رہا۔میڈیا رپورٹ کے مطابق ورجنک اٹلانٹک ایئر لائن کی برطانیہ

سے امریکہ جانے والی پرواز نے جب اڑان بھر ی تو اس کے معاون پائلٹ نے کیپٹن کو بتایا کہ اس نے ابھی تک اپنا فلائنگ ٹیسٹ مکمل نہیں کیا ہے جس پر 40منٹ کی پرواز مکمل کرچکنے والے جہاز کو حکام کی جانب سے واپس بلانے کا فیصلہ کیا گیا۔جہاز نے لندن کے ہیتھرو ایئرپورٹ سے نیویارک کیلئے اڑان بھری تھی اور حیرت انگیز طور پر اس مصروف ترین اور عالمی معیار کے انٹرنیشنل ایئرپورٹ پر انتہائی غیر ذمہ داری کا مظاہرہ دیکھنے میں آیا۔ہیتھرو ایئرپورٹ پر واپس بلائے جانے والے ورجنک اٹلانٹک ایئر لائن کے جہاز میں اس وقت 300 مسافر موجود تھے۔میڈیا کے مطابق ائیرلائن کے ترجمان نے اس غلطی کو روسٹرنگ ایرر قرار دیا ہے اور مسافروں سے معذرت بھی کی ہے۔رپورٹس کے تحت جہاز اترنے کے بعد معاون پائلٹ کو تبدیل کر کے دوبارہ جہاز کو جانے کی اجازت دی گئی لیکن اس دوران پرواز تاخیر کا شکار ہوئی۔ ترجمان نے اس ضمن میں بھی مسافروں سے معذرت کی ہے اور ساتھ ہی واضح کیا ہے کہ معاون پائلٹ کی تبدیلی کر کے ورجن اٹلانٹک کے تربیتی پروٹوکول کی مکمل تعمیل کی گئی ہے۔