لاہور(این این آئی)مسلم لیگ(ن) نے نومنتخب وزیر اعلی پنجاب کے حلف کے معاملے پر قانونی چارہ جوئی کا فیصلہ کر لیا، مسلم لیگ (ن) کی جانب سے منگل کے روز لاہور ہائیکورٹ میں وزیراعلی پنجاب کے حلف کیلئے پٹیشن دائر کئے جانے کا امکان ہے ۔ بتایا گیا ہے کہ لیگی قیادت نے نو منتخب وزیراعلی پنجاب کے حلف کے معاملے قانونی ماہرین سے مشاورت کی جس میں تمام پہلوئوں سے جائزہ لیا گیا اور یہ کہاگیا کہ وزیر اعلی کا حلف آئینی تقاضہ ہے اسے پورا کیا جانا نا گزیر ہے ۔ مشاورت میں اس سلسلہ میں عدالت عالیہ سے رجوع کرنے کا فیصلہ کیا گیا ۔ذرائع کے مطابق مسلم لیگ (ن)کی قانونی ٹیم نے مشاورت کے بعد پٹیشن تیار کر لی ہے جو منگل کے روز دائر کئے جانے کا قوی امکان ہے ۔