اسلام آباد (این این آئی)سابق کپتان شاہد آفریدی نے موجودہ سیاسی صورتحال میں مداحوں کیلئے پیغام میں کہاہے کہ عمران خان کو سڑکوں پر نہیں نکلنا چاہیے تھا،ہمیں ہر سیاسی وابستگی سے بالاتر ہو کر اپنی ریاست اور اس کے دفاع پر مامور اداروں کے ساتھ کھڑا ہونا چاہیے۔
سابق کپتان شاہد آفریدی نے ٹوئٹر پر لکھا کہ ریاست، سیاست و حکومت سے بہت اوپر ہوتی ہے جہاں بات ریاست پر آئے، وہاں ہر سیاسی وابستگی سے بالاتر ہو کر اپنی ریاست اور اس کے دفاع پر مامور اداروں کے ساتھ کھڑا ہونا چاہیے۔انہوں نے کہا کہ آپ کے اپنے ہیں، ایل او سی سے کوسٹ لائنز تک ہر سپاہی، ہر محافظ قابل احترام ہے۔شاہد آفریدی نے اپنی ٹوئٹ میں زور دیتے ہوئے مزید واضح کیا کہ ہماری افواج ہیں تو ہم ہیں۔ نجی ٹی وی کے مطابق اپنے بیان میں قومی کرکٹ ٹیم کے سابق کپتان شاہد آفریدی نے کہا کہ عمران خان کو سڑکوں پر نہیں نکلنا چاہیے تھا۔شاہد آفریدی نے کہا کہ ’اْن کا سوشل میڈیا اْٹھا کر دیکھ لیں انہوں نے آج تک عمران خان کی بہت تعریف کی ہے اور اْن کی مختلف موقعوں پر حوصلہ افزائی بھی کی، عمران خان کا نظریہ بہت اچھا تھا اْن کے ساتھ بہت مزہ آ رہا تھا۔انہوں نے کہا کہ جو لیڈر ہوتا ہے و خود کام نہیں کرتا وہ نظریہ بناتا ہے اْس پر ٹیم کام کرتی ہے، عمران خان کے پاس ایسی ٹیم نہیں تھی جو اْن کے نظریئے پر صحیح سے کام کرتی۔خیال رہے کہ گزشتہ روز آرمی چیف جنرل قمر جاوید باجوہ نے فوجی افسران سے گفتگو میں کہا تھا کہ فوج اورعوام کے درمیان پھوٹ پیدا کرنے کی کسی کوشش کو برداشت نہیں کیاجائیگا۔
