کراچی (این این آئی)چیئرمین بزنس مین گروپ (بی ایم جی) اور سابق صدر کراچی چیمبر آف کامرس اینڈ انڈسٹری (کے سی سی آئی) ایم زبیر موتی والا نے قومی اسمبلی کو تحلیل کرنے کی وجہ سے جاری سیاسی بحران پر گہری تشویش کا اظہار کرتے ہوئے کہا ہے کہ حالیہ سیاسی اتار چڑھاؤ سے پوری تاجرو صنعتکار برادری پریشان میں مبتلا ہے کیونکہ کرنسی میں مسلسل گراوٹ ،

اشیاء کی قیمتوں میں اضافہ، کرنٹ اکاؤنٹ اور مالیاتی خسارے میں اضافہ، زرمبادلہ کے ذخائر میں کمی کی وجہ سے معیشت پہلے ہی نازک صورتحال سے دوچار ہے اس لیے ان سیاسی بحرانوں کو زیادہ دیر تک نہیں رہنا چاہیے اور معیشت کو مزید مشکلات سے بچانے کے لیے جلد از جلد حل تلاش کرنا چاہیے۔ایک بیان میں انہوں نے کہاکہ کراچی شہر کی برآمدات جو گزشتہ سال 54 فیصد تھیں اب کم ہو کر 50 فیصد رہ گئی ہیں جیسا کہ قانون ساز جو زیادہ تر ہمہ وقت اپوزیشن سے نمٹنے میں مصروف رہتے ہیں ان کے پاس کراچی کی صنعتوں کو درپیش گیس کے مسئلے کو دیکھنے اور حل کرنے کا وقت ہی نہیں ہے جس کی وجہ سے رواں سال برآمدات میں 4 فیصد کمی آئی ہے جبکہ دیگر اقتصادی اشاریوں کے معاملے میں بھی یہی صورتحال ہے جو کہ سیاسی بے یقینی اور عدم توجہ کی وجہ سے بھی نیچے کی طرف گر رہے ہیں۔انہوں نے کہا کہ تاجر برادری موجودہ غیر یقینی سیاسی صورتحال پر سخت پریشان ہے۔ کاروبار ٹھپ ہونے کی وجہ سے گاہک بازاروں سے غائب ہو گئے ہیں اور تاجروں کو سرمائے کی شدید قلت کا سامنا ہے۔انہوں نے اس بات پر زور دیتے ہوئے کہا کہ معاملات کی قیادت کرنے والے لوگوں کو یہ سمجھ لینا چاہیے کہ سیاسی مسائل معیشت کو بری طرح نقصان پہنچا رہے ہیں اس لیے ان سے جلد از جلد تدبیر کے ساتھ نمٹنا ہی واحد حل ہے بصورت دیگر ہمیں خدشہ ہے کہ پہلے سے بیمار معیشت کو مزید چیلنجز کا سامنا کرنا پڑے گا اور معیشت کو رواں دواں رکھنے کی تمام کوششیں رائیگاں جائیں گی۔چیئرمین بی ایم جی نے کہا کہ کراچی چیمبر نے ہمیشہ حکومتوں سے وقتاً فوقتاً یہ مطالبہ کیا ہے کہ ملک کی تمام سیاسی جماعتوں کے ’’متفقہ چارٹر آف اکانومی‘‘ کو متعارف کرایا جائے اور اس پر سختی سے عمل درآمد کیا جائے لیکن بدقسمتی سے اس جائز مطالبے پر کبھی غور نہیں کیا گیا جو ملک کو درپیش تمام معاشی خرابیوں کی وجہ ہے۔ حکومتی پالیسیوں میں مستقل مزاجی اور آگے بڑھنے کا واضح روڈ میپ جو کہ چارٹر آف اکانومی کے ذریعے وضع کیا گیا ہو یقینی طور پر ملک کی ترقی و خوشحالی کا باعث بننے والے کلیدی کردار ادا کرے گا جو کہ چارٹر آف اکانومی کے ذریعے ہی حاصل کیا جا سکتا ہے۔انہوں نے مزید کہا کہ ملک کو ایک ایسے چارٹر آف اکانومی یا روڈ میپ کی اشد ضرورت ہے جو تاجروصنعتکار برادری کی مشاورت سے تیار کیا گیا ہو اور جس کی تائید تمام سیاسی جماعتوں نے کی ہو۔ انہوں نے امید ظاہر کی کہ سیاسی بحرانوں کو جلد از جلد خوش اسلوبی سے حل کر لیا جائے گا اور چارٹر آف اکانومی جو کہ وقت کی اہم ضرورت ہے ملک کے وسیع تر مفاد میں متعارف کرایا جائے گا اور اس پر عمل درآمد بھی کیا جائے گا کیونکہ کوئی بھی تاخیر معیشت کے لیے بہت نقصان دہ ثابت ہوگی۔