راولپنڈی (این این آئی)آرمی چیف جنرل قمر جاوید باجوہ سے افغانستان کیلئے سابق امریکی نمائندہ خصوصی زلمے خلیل زاد نے ملاقات کی جس میں باہمی دلچسپی، افغانستان سمیت علاقائی سلامتی کی صورتحال اور مختلف شعبوں میں دوطرفہ تعاون پر تبادلہ خیال کیا گیا
جبکہ آرمی چیف جنرل قمر جاوید باجوہ نے کہا ہے کہ افغانستان میںانسانی بحران سے نمٹنے کیلئے مخلصانہ کوششوں کی ضرورت ہے ۔آئی ایس پی آر کے مطابق آرمی چیف جنرل قمر جاوید باجوہ سے افغانستان کیلئے سابق امریکی نمائندہ خصوصی زلمے خلیل زاد کی جی ایچ کیو میں ملاقات ہوئی، افغانستان کیلئے امریکہ کے سابق نمائندہ خصوصی نے اسلام آباد سیکیورٹی ڈائیلاگ میں بطور کلیدی مقرر خطاب کے بعد آرمی چیف جنرل قمر جاوید باجوہ سے ملاقات کی جس میں باہمی دلچسپی کے امور، افغانستان سمیت علاقائی سلامتی کی صورتحال اور مختلف شعبوں میں دوطرفہ تعاون پر تبادلہ خیال کیا گیا۔ آرمی چیف نے افغانستان میں ممکنہ انسانی بحران کو روکنے کیلئے عالمی برادری پر مخلصانہ کوششوں کی ضرورت پر زور دیا، جنرل قمر جاوید باجوہ نے اسلام آباد سیکیورٹی ڈائیلاگ میں شرکت پر زلمے خلیل زاد کا شکریہ ادا کیا، زلمے خلیل زاد نے علاقائی استحکام کیلئے پاکستان کے کردار اور کوششوں کو سراہا۔ انہوں نے پاکستان کے ساتھ ہر سطح پر سفارتی تعاون مزید بہتری کے لئے اپنا کردار ادا کرنے کا عہد کیا۔ انہوں نے اسلام آباد سیکیورٹی ڈائیلاگ میں شرکت کا موقع ملنے پر بھی شکریہ ادا کیا۔
