اسلام آباد (این این آئی)اسپیکر قومی اسمبلی اسد قیصر کے خلاف تحریک عدم اعتماد لانے کی تجویز دی گئی ہے۔ذرائع نے بتایاکہ تجویز پاکستان پیپلزپارٹی کے بعض اہم رہنماؤں کی جانب سے ایک مشاورتی اجلاس میں دی گئی ہے۔ذمہ دار ذرائع کے مطابق جس مشاورتی اجلاس
میں یہ تجویز دی گئی اس کی صدارت چیئرمین پاکستان پیپلزپارٹی بلاول بھٹو زرداری کر رہے تھے۔ذرائع نے بتایا کہ چیئرمین پی پی بلاول بھٹو کی زیر صدارت منعقدہ مشاورتی اجلاس میں بعض رہنماؤں نے تجویز پیش کرتے ہوئے کہا کہ اسپیکر قومی اسمبلی اسد قیصر کے خلاف تحریک عدم اعتماد جاری اجلاس میں ہی پیش کی جائے۔ذرائع کے مطابق تجویز کے حامی اراکین کا مؤقف تھا کہ اس طرح اسپیکر قومی اسمبلی کے خلاف تحریک عدم اعتماد پیش کرنے کے لیے ریکوزیشن جمع نہیں کرانی پڑے گی۔ذرائع کے مطابق چیئرمین بلاول بھٹو کی جانب سے مانگی جانے والی آرا پر چند رہنماؤں نے خدشہ ظاہر کیا کہ اگر اس موقع پر یہ عمل شروع کیا تو پھر تاخیری حربوں کا سامنا کرنا پڑ سکتا ہے۔ذرائع کے مطابق بلاول بھٹو کی زیر صدارت منعقدہ مشاورتی اجلاس میں طے کیا گیا کہ اسپیکر قومی اسمبلی کے خلاف تحریک عدم لانے سے متعلق دیگر اپوزیشن جماعتوں سے مشاورت کی جائے گی۔
