اسلام آباد (آن لائن) چیئرمین و سربراہ پارلیمانی پارٹی پاکستان تحریک انصاف عمران خان کی ہدایت پر منحرف اراکین کیخلاف سخت کارروائی کا آغاز کر دیا گیا۔ اس سلسلے میں مشیرپارلیمانی امور ڈاکٹر بابر اعوان کی پاکستان تحریک انصاف کے مرکزی سیکرٹریٹ کا دورہ کیا

اور مرکزی ایڈیشنل سیکرٹری جنرل و رکن قومی اسمبلی عامر محمود کیانی سے خصوصی ملاقات کی۔ انہوں نے چیئرمین عمران خان کی ہدایات کی روشنی میں منحرف اراکین قومی اسمبلی کو اظہارِ وجوہ کے نوٹسز کے اجراء کی حکمت عملی پر تبادلہ خیال کیا۔ اظہارِ وجوہ کے نوٹسز کے ڈرافٹ کو حتمی شکل دے دی گئی۔ اراکین اسمبلی کو اظہارِ وجوہ کے نوٹسز دستورِ پاکستان کے آرٹیکل 63-اے کے تحت جاری کئے جارہے ہیں۔ دستورِ پاکستان کا آرٹیکل 63-اے اراکینِ اسمبلی کے فلور کراس کرنے پر کڑی قدغن عائد کرتا ہے۔ آئین کے تحت پارلیمانی پارٹی کے سربراہ کی جانب سے جاری پارٹی پالیسی سے انحراف کے مرتکب رکن قومی اسمبلی اپنی نشست سے ہاتھ دھونا ہوتے ہیں۔ تحریک انصاف کے منحرف اراکین قومی اسمبلی کو آج (جمعہ کو) دن 12 بجے تک اپنی پوزیشن واضح کرنے کی مہلت دی جائیگی۔ یکم اپریل دن 12 بجے تک جماعت کو مطمئن نہ کرنے والے اراکین کیخلاف سخت کارروائی عمل میں لائی جائے گی۔ ملاقات میں پارٹی پالیسی سے کھلے انحراف کے مرتکب اراکین قومی اسمبلی کیخلاف باضابطہ ریفرنسز سپیکر کو بھجوائے جائیں گے۔ پاکستان تحریک انصاف دستور کے آرٹیکل 63-اے کے تحت سپیکر سے منحرف اراکین کی نشستوں کو خالی قرار دینے کی سفارش کرے گی۔