کراچی(نیوز ڈیسک) پاکستان کو ”پیس ٹیلنٹ“ کے نئے ذخائر مل گئے، حکام کو یقین ہے کہ سابق اسپیڈ اسٹار وسیم اکرم کے کیمپ میں تربیت حاصل کرنے والے بولرز ملک و قوم کا نام روشن کریں گے۔تفصیلات کے مطابق پی سی بی سپر اسپیڈ اسٹار پروگرام کے تحت وسیم اکرم کی زیر نگرانی کیمپ نیشنل اسٹیڈیم کراچی میں ختم ہو گیا، اس دوران سابق کپتان نے13روز تک کھلاڑیوں کو بولنگ بہتر بنانے کیلئے مفید مشوروں سے نوازا، آخری دن چیئرمین پی سی بی شہر یارخان نے کیمپ کا دورہ کر کے فاسٹ بولرزکی کارکردگی کا جائزہ لیا، اس موقع پر وسیم اکرم نے انھیں تربیت کے حوالے سے تفصیلی طور پر آگاہ کیا، بعدازاں پریس کانفرنس میں شہر یارخان نے کہا کہ اس کیمپ کے دور رس نتائج سامنے آئیں گے، پاکستان کو فاسٹ بولرز کی ایک اچھی کھیپ میسر آگئی، اس سے مستقبل میں قومی کرکٹ ٹیم کو مزید بہتر نتائج کے حصول میں بھی مدد ملے گی، انھوں نے کہا کہ اپنے دور کے عظیم آل راو¿نڈر ملک وقوم کی خدمت کے خواہاں تھے،2013کی طرح اس برس بھی انھوں نے کراچی میں کیمپ لگا کر نوجوان پیسرز کی صلاحیتوں کو ا±جاگر کیا، انھوں نے کہا کہ وسیم اکرم نے سال میں2 مرتبہ ایسے کیمپ لگانے پر آمادگی ظاہر کر دی،ان کا یہ جذبہ قابل تحسین ہے، پی سی بی ان باصلاحیت بولرز کی بھرپور معاونت کرتے ہوئے تربیت کے ساتھ روزگار کی فراہمی اور علم کی روشنی سے منور کرانے میں بھی اپنا کردار ادا کرے گا۔اس موقع پر وسیم اکرم نے کہا کہ مصروفیات کے باوجود اپنے ملک کی خدمت کرنا چاہتا ہوں، اسی جذبے کے تحت اپنے تجربے سے نئے فاسٹ بولرز کی رہنمائی کا خواہاں رہا،گذشتہ کیمپ سے متعدد فاسٹ بولرز سامنے آئے، اب بھی ایسا ہی ہوگا، انھوں نے کہا کہ ہمارے ملک میں ٹیلنٹ کی کوئی کمی نہیں، رواں سال بھی ملک کے دوردراز علاقوں میں جاکر اوپن ٹرائلز کے بعد ہونہار بولرز کو تلاش کیا گیا، پھر انھیں کیمپ میں مناسب تربیت فراہم کی، میری کوشش رہی کہ بولنگ کی بنیادی تکنیک سے آگاہ کرنے کیساتھ ان کی خامیوںکو دور کرسکوں، وسیم اکرم نے کہا کہ فاٹا اور آزاد کشمیر جیسے علاقوں میں ایسے ہیرے موجود ہیں جنھیں مناسب تربیت دے کر عالمی سطح پر متعارف کرایا جا سکتا ہے،این سی اے کے ہیڈکوچ محمد اکرم نے کہا کہ مستقبل میں اچھے ٹیلنٹ کو سامنے لانے کیلیے کیمپ میں قومی اے، انڈر19پلیئرز کے ساتھ دور دراز علاقوں سے با صلاحیت بولرز کا انتخاب کرکے تربیت دی گئی، وسیم اکرم بھرپور محنت اور جذبے سے ان کی چھپی ہوئی صلاحیتوں میں نکھار لائے، یہ بولرز پاکستان کا اثاثہ ثابت ہوں گے