اسلام آباد (این این آئی)پاکستان مسلم لیگ (ن) پنجاب کے صدر رانا ثناء اللہ خاں کا وزیر داخلہ شیخ رشید کے بیان کو گھبراہٹ قرار دیتے ہوئے کہاہے کہ ’’باس‘‘ کو سب سے پہلے دغا کی چھری چپڑاسی نے مارنی ہے،’’کچل دوں گا‘‘ کی دھمکیاں دینے والے غنڈہ گرد کو مولانا فضل الرحمان

نے جو ٹریلر دکھایاتو اس کے منہ سے صلح صفائی کے لفظ نکلنا شروع ہوگئے ۔ اپنے بیان میں انہوںنے کہاکہ پنڈی کا شیطان ’’بغل میں چھری، منہ میں رام رام‘‘کردار ہے ۔ انہوں نے کہاکہ پارلیمنٹ پر حملے کے بعد پارلیمنٹ لاجز پر حملہ اور ایم این ایز کو اغوا کرانے کے بعد صلح کا بیان گھبراہٹ ہے۔ انہوںنے کہاکہ ’’باس‘‘ کو سب سے پہلے دغا کی چھری چپڑاسی نے مارنی ہے۔ انہوں نے کہاکہ ’’کچل دوں گا‘‘ کی دھمکیاں دینے والے غنڈہ گرد کو مولانا فضل الرحمان نے جو ٹریلر دکھایا، تو اس کے منہ سے صلح صفائی کے لفظ نکلنا شروع ہوگئے ۔انہوںنے کہاکہ گندگی اور کچرے کی بدبو بتاتی ہے کہ یہ گند ہے، اس کی صفائی ہی علاج ہوتا ہے ،’’مار دو، مر جائو، جلاؤ، گھیراؤ‘‘کے اعلانات کرنے والے غنڈہ گرد کی اصلیت سب کو پتہ ہے ۔ انہوں نے کہاکہ تحریک عدم اعتماد آنے کے بعد باس اور چپڑاسی ہر روز ایک نئی بونگی مارتے ہیں، قوم کو جلد بونگوں سے نجات ملنے والی ہے ،چپڑاسی ٹھیک کہتا ہے، اس کا باس جیل میں پانچ سال پورے کریگا۔