لاہور(این این آئی)مسلم لیگ (ن) پنجاب کے صدر رانا ثنا اللہ خان نے کہا ہے کہ نواز شریف کا بیانیہ او رموقف کامیاب نظر آرہا ہے،یہاں کوئی اشارہ نہیں ہوتا بلکہ یہی کہا جاتا ہے کہ آپ اپنی مرضی کریں اور جو سیاسی طو رپر مناسب ہے وہ کریں،اتحادی کسی اور کے ہیں لیکن وہ بھی آج نواز شریف کے فیصلے کے منتظر ہیں،

تحریک عدم اعتماد کی کامیابی کے بعد ملک کا آئندہ وزیر اعظم اورپنجاب کا وزیر اعلیٰ کون ہوگا اس کا فیصلہ بھی نواز شریف کریں گے۔ لاہور ہائیکورٹ بارایسوسی ایشن کے انتخابات میں ووٹ کاسٹ کرنے کے بعد میڈیا سے گفتگو کرتے ہوئے رانا ثنا اللہ خان نے کہا کہ آج ملک کی جو صورتحال ہے اس میں نواز شریف کا بیانیہ اور موقف کامیاب نظر آرہا ہے۔ نواز شریف کا موقف تھاکہ سیاست کرنا سیاستدانوں کا کام ہے اور انہیں ہی کرنی چاہیے، غیر سیاسی مداخلت نہیں ہونی چاہیے، ٹیلی فون اور اشارے سیاست کو خراب کرتے ہیں، آج نواز شریف کا بیانیہ کامیاب ہوتا ہوا نظر آرہا ہے۔ انہوں نے کہا کہ مسلم لیگ (ن) نے اپنا ہوم ورک مکمل کرکے فیصلوں کا اختیار نواز شریف کو تفویض کر دیا ہے، متحدہ اپوزیشن نے بھی اپنا اپنا کام کر کے اپنی تجاویز نواز شریف کے سامنے رکھ دی ہیں۔ انہوں نے کہا کہ پی ٹی آئی کے وہ ممبران جو ضمیر کی آواز پر لبیک کہنا چاہتے ہیں وہ بھی فیصلے کے منتظر ہیں۔ اتحادی ہیں تو کسی اور کے لیکن وہ بھی نواز شریف کے فیصلے کے منتظر ہیں، عدم اعتماد کب پیش ہونی ہے اس کی حکمت عملی کیا ہوگی اس کا فیصلہ بھی نواز شریف نے کرنا ہے اور اتحادی نواز شریف کے فیصلے کے منتظر ہیں۔ انہوں نے کہا کہ عزت اور ذلت اللہ کے ہاتھ میں ہے، میں پنڈی کے شیطان اور دوسرے لوگوں سے پوچھتاہوں وہ آج اپنی آنکھوں سے سب دیکھ لیں۔