کیف ٗ واشنگٹن (این این آئی)یوکرین پر حملے کے بعد روس سے اہم فٹبال مقابلے کی میزبانی چھین لی گئی۔گزشتہ دنوں روس نے اپنے پڑوسی ملک یوکرین پر حملہ کیا جس کے بعد امریکا، برطانیہ اور یورپی ممالک نے روسی اداروں پر مالی پابندیاں لگانا شروع کردیں اور اب کھیل پر بھی جنگ کے کالے بادل چھانے لگے ۔

رپورٹس کے مطابق دی یونین آف یورپین فٹبال ایسوسی ایشن (یوئیفا) چمپئن شپ 2021ـ22 کا فائنل رواں سال روس کے شہر سینٹ پیٹرزبرگ میں ہونا تھا تاہم اب اس کی میزبانی روس سے واپس لے لی گئی ہے۔رپورٹس کے مطابق یوئیفا کے فائنل کی میزبانی اب روس کے بجائے فرانس کرے گا اور فائنل میچ 28 مئی کو پیرس میں ہوگا۔رپورٹس میں کہا گیا کہ یوئیفا ایگزیکٹو کمیٹی نے یہ فیصلہ یورپ کی سکیورٹی صورتحال کے باعث کیا۔رپورٹس کے مطابق اجلاس میں یہ بھی فیصلہ کیا گیا کہ یوکرین اور روس کی قومی فٹبال ٹیمیں اور کلبز اپنے میچز کسی نیوٹرل مقام پر کھیل سکتی ہیں۔دوسری جانب امریکا نے یوکرین پر حملے کے ردعمل کے طور پر روس کی سب سے بڑی شپنگ کمپنی سووکم فلوٹ پر پابندی لگا دی۔غیر ملکی میڈیا رپورٹس کے مطابق امریکا نے روس کی شپنگ کمپنی سووکم فلوٹ کے ساتھ کسی بھی قسم کی لین دین پر پابندی عائد کی ہے تاہم میڈیا رپورٹس کے مطابق یہ بات واضح نہیں ہے کہ 30 سے زائد بحری جہاز رکھنے والی شپنگ کمپنی جو مختلف ممالک کو ایل این جی، آئل اور گیس سپلائی کرتی ہے اس پر یہ پابندیاں کس طرح سے اور کس حد تک اثر انداز ہوں گی۔