تبلسی(نیوز ڈیسک)بارسیلونا نے اضافی وقت میں متبادل کھلاڑی پیڈرو کے گول کی وجہ سے یوئیفا سوپر کپ میں تاریخی کامیابی حاصل کی ہے۔جارجیا کہ دارالحکومت تبلسی میں بدھ کو کھیلے گئے فائنل میچ میں یورپا لیگ کے فاتح سیویلا کو چیمپیئنز لیگ کے فاتح بارسیلونا نے چار کے مقابلے پانچ گول سے شکست دی۔خیال رہے کہ اس جیت کے ساتھ بارسیلونا نے اے سی میلان کے پانچ بار اس خطاب کو جیتنے کا ریکارڈ برابر کر دیا ہے۔مقررہ وقت تک دونوں ٹیمیں چار چار گول کی برابری پر تھیں۔ بارسیلونا کے مایہ ناز کھلاڑی لیونل میسی نے بارسیلونا کی جانب سے دو گول کرکے اسے ابتدا میں ہی ایک گول کی سبقت دلا دی تھی پھر ریفینہا اور لوئی سواریز نے اسے 1 ۔ 4 کی برتری میں تبدیل کر دیا۔اس کے بعد سیویلا کی جانب سے جوز اینٹونیو، کیون گیمیرو کی پینلٹی اور کونوپلائینکا کے گول کی بدولت یہ کھیل اضافی وقت میں چلا گیا۔بارسیلونا کے کوچ اور تمام کھلاڑیوں نے فائنل وھسل کے ساتھ زبردست جشن منائے۔بارسیلونا اگر سپینش سپر لیگ جیت لیتا ہے تو وہ اس کی رواں سال کی پانچویں ٹرافی ہوگی۔یورپیئن چیمپیئن ہونے کی وجہ سے وہ دسمبر میں جاپان میں ہونے والے 2015 فیفا کلب ورلڈ کپ میں بھی شرکت کریں گے۔لیونل میسی کو ان کی شاندار کارکردگی کی وجہ سے مین آف دا میچ قرار دیا گیا۔انھوں نے ساتویں اور 15 ویں منٹ میں دو شاندار گول کیے جبکہ ان کی فری کک پر متبادل کھلاڑی پیڈرو نے گول کرکے بارسیلونا کو تاریخی کامیابی سے ہمکنار کیا۔