لاہور( این این آئی)ملک کی موجودہ سیاسی صورتحال میں جہانگیر ترین گروپ بھی متحرک ہو گیا ، عون چوہدری کی جانب سے اپنی رہائشگاہ پر گروپ کے اراکین کے اعزاز میں عشائیہ دیا گیا جس میں جہانگیر ترین سمیت گروپ میں شامل اراکین قومی و صوبائی اسمبلی اور دیگر رہنما شریک ہوئے ۔ذرائع کے مطابق جہانگیر ترین گروپ کے رکن عون چوہدری کی جانب سے اپنی رہائشگاہ پر عشائیہ دیا گیا

جس میں جہانگیر ترین ،اسحاق خاکونی، راجہ ریاض، ملک نعمان لنگڑیال،اجمل چیمہ، خرم لغاری، اسلم بھروانہ، آصف مجید، بلاول وڑائچ،عمر آفتاب ڈھلوں، طاہر رندھاوا،زوار وڑائچ، نذیر بلوچ، امین چودھری، سعید اکبر نوانی، افتخار گوندل ، غلام رسول، سلمان نعیم،قاسم لنگا، سمیع گیلانی، خواجہ شیراز، مبین عالم انور،غلام لالی،عبد الحی دستی، رفاقت گیلانی، فیصل جیوانہ سمیت دیگر شریک ہوئے ۔ ذرائع کے مطابق عشائیے کے موقع پر موجودہ سیاسی صورتحال پر تفصیلی مشاورت کی گئی ،اپوزیشن کی جانب سے تحریک عدم اعتماد کیلئے سر گرمیوں بالخصوص حکومتی اتحادیوں سے رابطوں بارے تبادلہ خیال کیا گیا ۔ ذرائع کے مطابق اجلاس میں گروپ سے ہونے والے غیر اعلانیہ رابطے بھی زیر بحث آئے ۔ ذرائع کے مطابق جہانگیر ترین گروپ نے فی الوقت دیکھو اور انتظار کرو کی پالیسی کو ہی جاری رکھنے کا فیصلہ کرتے ہوئے ہر لمحے بدلتی صورتحال کا جائزہ لینے اور اس حوالے سے مزید مشاورتی اجلاس بلانے پر اتفاق کیا ہے ۔ ذرائع کے مطابق اجلاس میں فیصلہ کیا گیا ہے کہ سیاسی صورتحال میں گروپ اپنا فعال کردار ادا کرے گا۔