لاہور (مانیٹرنگ ڈیسک، این این آئی)لاہورسمیت پنجاب بھر میں کورونا وبا کی پانچویں لہر شدت اختیار کرتے ہی میڈیکل اسٹورز پر بخار کی ادویات کی قلت پیدا ہو گئی ہے۔عام بخار اور کورونا سے بچاؤ کی دوا بھی مارکیٹ سے غائب ہے جس کے نتیجے میں پریشان حال مریضوں اور ان کے لواحقین کو جان کے لالے پڑ گئے ہیں۔وزیراعلیٰ پنجاب عثمان بزدار نے

ادویات کی قلت کا نوٹس لیتے ہوئے حکام کو ملوث افراد کے خلاف سخت کارروائی کا حکم دیا ہے۔دوسری جانب سیکرٹری صحت پنجاب عمران سکندر بلوچ کا کہنا ہے کہ پنجاب میں بخار کی دوا کی کوئی قلت نہیں ہے، صوبے میں اس وقت مجموعی طور پر 6 کروڑ 86 لاکھ گولیوں کا اسٹاک موجود ہے۔دریں اثنا پاکستان مسلم لیگ (ن)کی ترجمان مریم اورنگزیب کی کورونا کی شدت میں بخار کی گولی نایاب ہونے اور بلیک میں فروخت ہونے کی شدید مذمت کرتے ہوئے کہاکہ کرونا کی شدید لہر کے دوران بازار سے بخار کی گولی غائب ہونا انتہائی شرمناک ہے ۔سیاسی بلیک مارکیٹنگ سے آنے والی حکومت میں بخار کی گولی سے ایل ایل این جی اور کھاد تک ہر چیز کی کالا بازاری جاری ہے ۔عوام کیلئے روزگار غائب، مریض کیلئے دوائی غائب ، کسان کے لئے کھاد غائب شرم آنی چاہیے ۔ انہوں نے کہاکہ آٹا غائب، چینی غائب، یوریا اور ڈیپ غائب، اور اب کورونا کی شدت میں بخار کی گولی غائب،عمران صاحب نے ملک سے گیس

غائب کردی اور اپنے مافیاز کی جیبیں بھریں،عمران صاحب نے بجلی غائب کر دی اور مہنگے فرنس آئل سے بجلی بنا کر عوام کی مسلسل جیب کاٹ رہے ہیں ،اصل میں تو حکومت کو فارغ ہونا چاہئے جس نے عوام کی خوشحالی، روزگار ، کاروبار سب کچھ غائب کر دیا ہے۔چینی ، آٹا ، گیس ، بجلی ، دوائی ، کھاد عمران مافیا عوام کی جان کھا رہا ہے۔