لاہور(این این آئی)متحدہ قومی مومنٹ کے سابق سینیٹر میاں عتیق کو لاہور سے گرفتار کر لیا گیا،سابق سینیٹر کے خلاف تھانہ گنجمنڈی راولپنڈی میں مقدمہ درج ہے جس میں ان کے خلاف جعلی پراپرٹی دستاویزات دینے کا الزام ہے۔نجی ٹی وی نے ترجمان راولپنڈی پولیس کے حوالے سے بتایاہے کہ میاں عتیق اور دیگر کے خلاف مقدمہ جون2021 میں درج ہوا جبکہ تمام ملزمان مقدمے میں اشتہاری ہیں۔راولپنڈی پولیس کی درخواست پر قلعہ گجر سنگھ پولیس نے سابق سینیٹر کو گرفتار کیا جنہیں اب راولپنڈی پولیس کے حوالے کیا جائے گا۔ترجمان نے گرفتاری کی تصدیق کرتے ہوئے کہا کہ میرٹ پر تفتیش کرتے ہوئے مقدمہ کو یکسوئی کے ساتھ حل کیا جائے گا، پولیس قانون کی بالادستی اور میرٹ پر یقین رکھتی ہے جسے ہر صورت یقینی بنایا جائے گا۔