پٹس برگ(این این آئی) سوشل میڈیا پر آج کل دنیا کے سب سے بڑے فرائی پین کے چرچے ہیں جو 18 فٹ لمبا اور 6.5 ٹن وزنی ہے جبکہ اسے ڈھلواں لوہے (کاسٹ آئرن)سے بنایا گیا ہے۔میڈیارپورٹس کے مطابق اسے امریکی شہر پٹس برگ کی ایک مرکزی شاہراہ پر ایک بڑے ٹرالر میں

جاتے ہوئے دیکھا گیا اور سوشل میڈیا صارفین نے حیران ہو کر فورا اس کی تصویریں بھی شیئر کرا دیں۔ دنیا کے اس سب سے بڑے فرائی پین کو لاج کاسٹ آئرن میوزیم میں نمائش کیلیے رکھا جائے گا جو جنوبی پٹس برگ میں زیرِ تعمیر ہے۔ہینڈل سے لے کر مخالف سرے تک اس کی لمبائی 18 فٹ ہے لیکن اب تک گنیز ورلڈ ریکارڈ میں اندراج کیلیے اس حوالے سے کوئی درخواست جمع نہیں کروائی گئی ۔لاج کاسٹ آئرن میوزیم میں ڈھلواں لوہے کی مختلف مصنوعات اور ان کی تیاری کے مراحل بطور نمائش رکھے جائیں گے جبکہ یہ دیوقامت فرائی پین اس عجائب گھر کے باہر نصب کیا جائے گا تاکہ لوگوں کو اس طرف متوجہ کیا جاسکے۔توقع ہے کہ یہ میوزیم اس سال مئی یا جون تک مکمل ہوجائے گا اور عوام کیلئے کھول دیا جائے گا۔