لاہور( این این آئی) مسلم لیگ (ن) پنجاب کی سیکرٹری اطلاعات عظمی بخاری نے کہاہے کہ پرچی ترجمان صبح صبح چابی والے کھلونے وزیراعلی کی تعریفیں کرنے آجاتے ہیں،عثمان بزدار جیسے شخص کو وزیراعلی کہنا پنجاب کے عوام کی توہین ہے ،کارکردگی بتانی
نہیں دکھانی پڑتی ہے لیکن اس چور پارٹی کا کارکردگی سے کیا لینا دینا ہے۔ اپنے بیان میں انہوں نے کہا کہ جن لوگوں نے زکوة اور خیرات کھانے کے ریکارڈ بنائے ہوں جو اب ثابت بھی ہوگئے وہ اب ملکی خزانے پر ہاتھ صاف کر رہے ہیں،جس شخص کو لاہور کا راستہ معلوم نہیں تھا اس کو پنجاب کے سیاہ سفید کا مالک بنادیا،شہبازشریف کی انتھک محنت کی بدولت آج لاہور میں بارش کا پانی جمع نہیں ہوتا،شہبازشریف کولمبے بوٹوں کے طعنے وہ دے رہے ہیں جو خود ایک دن بھی بوٹوں کے بغیر نہیں نکال سکتے ،شہبازشریف خادم اعلی تھے اس لیے ہر وقت عوام کے درمیان ہوتے تھے ،عثمان بزدار خود ایک کٹھ پتلی کا خادم ہے اس کو عوام کے مسائل سے کیا سروکار ہوگا؟۔ انہوں نے کہا کہ نوازشریف لندن میں بیٹھ کر جو عمران خان کا علاج کررہے ہیں وہ کافی نہیں ؟نوازشریف واپس بھی آئیں گے اور چوتھی بار وزیراعظم بھی بنیں گے ،پاکستان کا روشن مستقبل صرف مسلم لیگ(ن)سے ہی وابستہ ہے ،ملکی تاریخ یہی بتاتی ہے نوازشریف کے علاوہ کسی لیڈر میں ملک کو بحرانوں سے نکالنے کی صلاحیت نہیں ۔
