لاہور( این این آئی )صوبائی محکمہ پرائمری اینڈ سیکنڈری ہیلتھ کیئر نے کورونا وائرس کے کیسز میں بتدریج کمی کے پیش نظر مارکیٹس پر عائد تمام پابندیاں ختم کرنے کا فیصلہ کیا ہے۔اس سلسلے میں محکمہ پرائمری اینڈ سیکنڈری ہیلتھ کی جانب سے باقاعدہ نوٹیفکیشن جاری کردیاگیا ہے۔نوٹیفکیشن کا اطلاق 21دسمبر سے پنجاب بھر کے تمام 36 اضلاع پر ہو گا۔ صوبائی سیکرٹری صحت عمران سکندر بلوچ نے کہاکہ تمام کاروباری مراکز ہفتہ کے

ساتوں دن 24 گھنٹے کھلے رہیں گے۔ تمام کاروباری سرگرمیاں احتیاطی تدابیر اور ایس او پیز کے ساتھ جاری رکھنے کی اجازت ہو گی۔ ضلعی انتظامیہ اور قانون نافذ کرنے والے ادارے نوٹیفیکیشن کا باقاعدہ اطلاق یقینی بنائیں گے۔ عمران سکندر بلوچ نے کہاکہ عوام معاملات زندگی بحال رکھنے کیلئے ماسک پہننے، سماجی فاصلہ رکھنے سمیت ہاتھوں کی صفائی کا خیال رکھیں۔ تمام اہل افراد جلد از جلد ویکسین لگوائیں۔ 12سال سے زائد عمر کے تمام طالب علم ویکسی نیشن یقینی بنائیں گے۔