لاہور(این این آئی ) سنگدل باپ نے پاپا نہ کہنے پر تین سالہ بیٹے پر بہیمانہ تشدد کر کے اسے قتل کر دیا اور گرفتاری کے ڈر سے سیشن کورٹ سے عبوری ضمانت کرالی۔پنجاب کے دارلحکومت لاہور میں سنگدل باپ نے تین سالہ بیٹے پر بہیمانہ تشدد کرکے قتل کرڈالا، پولیس نے ملزم کیخلاف

تھانہ شالیمارمیں قتل کی دفعات کے تحت مقدمہ درج کرلیا۔مقتول بچے کے باپ شاہد نے گرفتاری کے ڈر سے سیشن کورٹ سے عبوری ضمانت کرالی، عدالت کو بتایا گیا کہ الزام جھوٹا ہے قتل نہیں کیا لہذا ضمانت منظور کی جائے ۔عدالت نے ملزم کی عبوری ضمانت میں 2 دسمبر تک توسیع کرتے ہوے پولیس سے رپورٹ طلب کر لی۔بچے کی ماں میرا بی بی نے بھی عدالت میں پیش ہو کر بیان ریکارڈ کرایا، دکھیاری ماں نے کہا کہ ملزم نے میرے معصوم بیٹے تین سالہ بچے فرحان علی کو قتل کیا۔میرا بی بی کا کہنا تھا کہ بچہ پاپا نہیں کہتا تھا اس لیے مارتے تھے، وقوعہ کے روز ملزم نے بچے کو بے دریغ ہری مرچ کھلائیں ، پھر زمین پر پٹخ دیا ، جس سے بچہ جاں بحق یو گیا ۔مقتول بچے کی ماں نے بتایا بیٹے کو چھڑوانے کی کوشش کی تو مجھ پر بھی تشدد کیا،ملزم شاہد پہلے بھی پانچ شادیاں کر چکا ہے۔