لاہور( این این آئی)چیف ایگزیکٹو آفیسر ہیلتھ لاہور کا دفتر اسلحے اور شراب کی نمائش کا مرکز بن گیا جس کی تصاویر بھی سوشل میڈیا پر وائرل ہو گئیں ،آل پاکستان کلرکس ایسوسی ایشن ڈسٹرکٹ ہیلتھ اتھارٹی کے احتجاج کے بعد پشت پناہی کرنے والے سینئر کلرک عبد الجبار ،اسلحے
اور شراب کی نمائش کرنے والے نائب قاصد بلال بٹ کے خلاف تحقیقات کا آغاز کر دیا گیا۔ ایپکا ڈی ایچ اے لاہورکے صدر محمد اسماعیل خان نیازی نے دیگر عہدیداروںکے ہمراہ میڈیا کیلئے جاری کئے گئے اپنے بیان میں کہا ہے کہ بلال پرویز بٹ جو کہ بطور نائب قاصد سی ای او ہیلتھ لاہور کے دفتر میں تعینات ہے سینئر کلرک عبدالجبارکی پشت پناہی میں دونوںرات گئے فیلڈ میں کام کرنے والی لڑکیوںکو اپنے سرکاری دفترمیں تبادلے کرانے کاجھانسہ دے کر بلاتے ہیں اور شراب کے نشے میں دھت ہو کر انہیں ہراساںکیا جاتا ہے ۔انہوںنے الزام عائد کیا کہ بلال بٹ مختلف میڈیکل سٹورزسے بھی وصولیاںکرتا ہے جبکہ ملازمین کو خوفزدہ کرنے کیلئے اسلحے کی نمائش بھی کی جاتی ہے۔انہوں نے کہا کہ اگر دونوں کے خلاف محکمانہ کارروائی عمل میںنہ لائی گئی تو محکمے کی عزت کو بچانے کیلئے ہڑتال کرنے سے بھی گریز نہیں گے۔
