خالق نگر(این این آئی)احساس کفالت پروگرام کاہنہ میں بنائے گئے سنٹر پر نان سٹاپ لوٹ مارکا سلسلہ جاری،غریب مستحق خواتین میں تقسیم ہونے والی رقم سے بلا خوف و خطر ایک ہزار سے دو ہزار روپے کٹوتی کی جانے لگی، کاہنہ میڈیا کلب (رجسٹرڈ) کے مطابق کاہنہ میں

احساس کفالت پروگرام کے تحت خواتین میں تقسیم ہونے والی امدادی رقم بارہ ہزار روپے میں سے بلا خوف وخطر ایک ہزار سے دو ہزار روپے سرعام احساس سنٹرکاہنہ کے ریٹیلرکاٹ رہے ہیں، لوٹ مار کا یہ سلسلہ کئی روزسے جاری ہے، کاہنہ احساس کفالت سنٹر پر موجود مستحق خواتین نے احتجاج کرتے ہوئے بتایا کہ سنٹر پر موجود ریٹیلروں کے رکھے ہوئے ایجنٹوں کو فی کس ایک سے دو ہزار روپے دیے بغیر امدادی رقم کا حصول ممکن نہیں ہے،کاہنہ سنٹرمیں موجود بااثر نوسرباز ریٹیلرز مستحق خواتین کی امداد پرکھلے عام ڈاکہ مار رہے ہیں، سنٹر پر تعینات مقامی پولیس کے اہلکاروں اور سیکورٹی اہلکاروں کو بھی کاہنہ سنٹر میں ہونے والی سرعام کرپشن کے بارے آگاہ کیا گیا مگر وہ بھی ٹس سے مس نہ ہوئے ،کاہنہ میڈیا کلب (رجسٹرڈٖ) کوسنٹرمیں موجودخواتین نے بتایا کہ انتظامیہ امداد کی صاف شفاف تقسیم میں بری طرح ناکام دکھائی دیتی ہے۔ ذرائع سے معلوم ہوا ہے کہ کاہنہ احساس پروگرام سنٹر پر عورتوں میں تقسیم ہونے والی امداد کا بڑا حصہ افسران کی ملی بھگت سے خرد برد ہو رہا ہے مستحق خواتین کی امداد پر دیدہ دلیری سے ڈاکہ مارا جا رہا ہے کوئی سننے والا نہیں ہے،کئی روز سے مسلسل کاہنہ سنٹرپر ہونے والی کرپشن کے بارے میں عورتیں احتجاج کر رہی ہیں، لاکھوں روپے کی کرپشن ہونے کے باوجود اعلیٰ حکام کا حرکت میں نہ آنا سوالیہ نشان ہے،کاہنہ کی سیاسی،سماجی،صحافتی تنظیموں نے اعلیٰ حکام سے از سر نو تحقیقات کرکے کرپشن میں ملوث ریٹیلرز اور ان کی سرپرستی کرنے والے افسران کے خلاف کاروائی کا مطالبہ کیا ہے۔