اسلام آباد(نیوز ڈیسک)جاپان میں پاکستان کے سفیرفاروق عامل نے کہا ہے کہ پاکستان کو جاپان کی شکل میں آموں کی بہت بڑی مارکیٹ میسر آچکی ہے تاہم اب جاپان آنے والے آموں کے معیار کو برقرار رکھنا پاکستانی برآمد کنندگان کی ذمہ داری ہے ، سفیر پاکستان نے کہا کہ جاپان میں آنے والا چوسا آم فی آم ایک ہزار روپے تک فروخت ہوگا جس سے برآمد کنندگان بھاری نفع حاصل کرسکیں گے ،تاہم سفارتخانہ پاکستان آموں کے بعد کینو ، مالٹے ،آروی اور بھنڈی بھی جاپان لانے کے لیے کام کرے گا ، یہ بات ا نہوں نے سیالکوٹ چیمبر آف کامرس اینڈانڈسٹری کے بارہ رکنی وفد سے بات چیت کرتے ہوئے کہی ، انھوں نے کہا کہ پاکستانی سرمایہ کاروں کے لیے جاپان بہت بڑی منڈی ثابت ہوسکتی ہے تاہم جاپانی معیار کے مطابق اشیاءتیار کرنا اولین شرط ہے ، سفیر پاکستان نے کمرشل قونصلر شہزاد احمد کی جاپان اور پاکستانی سرمایہ کاروں کے درمیان تجارت کے فروغ کے لیے خدمات کو سراہتے ہوئے کہا کہ فرض شناس افسران کی بدولت پاکستانی اشیاءجاپان میں متعارف کرانے میں کامیابی حاصل ہورہی ہے ، اس موقع پر سیالکوٹ چیمبر کے وفد کے سربراہ قیصر بیگ نے جاپانی کاروباری افراد کے ساتھ ہونے والے مذاکرات کے حوالے سے سفیر پاکستان کی بریفنگ دی اور اپنے دورہ جاپان کو انتہائی مفید قرار دیا۔