اسلام آباد(نیوز ڈیسک) وزارت صنعت و پیداوار کے ذیلی ادارے یوٹیلٹی اسٹورز کارپوریشن نے چترال میں سیلاب میں گھرے ہوئے افراد کو ریلیف فراہم کرنے کے لیے پیکج کا اعلان کر دیا، چترال میں عوام کو سستی اشیا فراہم کرنے کے لیے پانچ نئی برانچیں کھولی جائیں گی۔دور دراز علاقوں میں اشیائے خوردونوش فراہم کرنے کے لیے پانچ موبائل اسٹورز دن رات کام کریں گے۔ موبائل اسٹورز دور دراز علاقوں میں مختلف پوائنٹس پر دو گھنٹے کے لیے قیام کریں گے۔یوٹیلٹی اسٹورز کارپوریشن کے ترجمان کے مطابق وزیراعظم پاکستان میاں نواز شریف کی ہدایت پر وزارت صنعت وپیداوار کے ذیلی ادارہ یوٹیلٹی اسٹورز کارپوریشن نے چترال میں متاثرہ عوام کے لیے ریلیف پیکج کا آغاز کر دیا ہے۔ چترال میں یوٹیلٹی اسٹورز کارپوریشن کے نیٹ ورک کو مزید وسعت دی جارہی ہے جس سے چترال کے عوام کو معیاری اشیا ضروریہ سستے داموں فراہم کی جائیں گی۔منیجنگ ڈائریکٹر یوٹیلٹی اسٹورز کارپوریشن نے چترال میں مزید 5نئی برانچیں کھولنے کی منظوری دے دی ہے جس کے لیے موزوں جگہ تلاش کی جار ہی ہے اور بہت جلد اس کو کھول دیا جائیگا۔ اس کے علاوہ 5موبائل اسٹورز بھی قائم کر دیے گئے ہیں جو کہ دور دراز علاقوں میں ٹرکوں کے ذریعے اشیا ضروریہ جیسے چینی، دالیں، آٹا، گھی، چائے وغیرہ کی ترسیل کی جائیگی۔ یہ موبائل اسٹورز(ٹرک) ہر پوائنٹ پر 2گھنٹے کے لیے قیام کریگا۔ اس سے وہاں کے عوام کو ضروری اشیا خوردونوش سستے داموں ان کی دہلیز پر فراہم کی جائیگی۔ ترجمان کے مطابق یوٹیلٹی اسٹورز کارپوریشن عوام کو نو پرافٹ نو لاس پر اشیا کی فراہمی کرتی ہے اور کئی اشیا پر سبسڈی بھی فراہم کرتی ہے، رمضان میں کامیاب آپریشن کے بعد اب وطن عزیز کے سیلاب میں گھرے افراد کو فوری ریلیف دینے کے لیے اقدامات کیے جارہے ہیں تاکہ ان کو اشیا کی فوری فراہم کی جاسکیں۔