لاہور( این این آئی)وزیراعلیٰ پنجاب سردار عثمان بزدار دوران سروس انتقال کر نے والے سرکاری ملازمین کے لواحقین کی آواز بن گئے۔ وزیراعلیٰ عثمان بزدار نے

دوران سرو س انتقال کرنے والے سرکاری ملازمین کے لواحقین کو ملازمتیں دینے میں تاخیر کا سخت نوٹس لیتے ہوئے رپورٹ طلب کر لی ہے۔ وزیراعلیٰ عثمان بزدار نے لواحقین کو ملازمتیں دینے کے حوالے سے کیسوں کو زیر التواء رکھنے پر سخت برہمی کا اظہار کرتے ہوئے تمام انتظامی محکموں اور فیلڈ فارمیشنز سے پنجاب سول سرونٹس رولز 1974 کے رول 17 ۔ اے کے تحت زیر التواء کیسوں کی رپورٹ طلب کرلی۔وزیراعلیٰ عثمان بزدار نے کہا کہ رول 17۔اے کے تحت دوران سروس انتقال کرنے والے سرکاری ملازمین کے لواحقین ملازمت کا قانونی حق رکھتے ہیں۔ملازمت میں تاخیر سے لواحقین اپنے جائز حق سے محروم ہوتے ہیں۔ایسے معاملات میں تاخیرکسی صورت قابل قبول نہیں ۔وزیراعلیٰ عثمان بزدار نے زیر التواء کیسوں کو جلد نمٹانے کا حکم دیتے ہوئے کہا کہ قواعدوضوابط کے تحت زیر التواء کیسوں کو ایک ماہ کے اندر نمٹایا جائے اور زیر التوا ء کیسوںکے بارے میں فیصلے کرکے رپورٹ وزیراعلیٰ آفس پیش کی جائے۔ وزیر اعلیٰ آفس کی جانب سے پنجاب سول سرونٹس رولز 1974 کے رول 17 ۔ اے کے تحت تقرری کیلئے مراسلہ جاری کر دیا گیا ہے۔