کراچی(نیوزڈیسک) بالی ووڈ فلم بجرنگی بھائی جان سے راتوں رات شہرت پانے والے پاکستانی صحافی چاند نواب کا کہنا ہے کہ فلم کی کامیابی میں ان کا حصہ بھی شامل ہے۔ چاند نواب کا کہنا تھا کہ بجرنگی بھائی جان ریلیز ہونے سے 2 روز قبل مجھے پتہ چلا کہ فلم میں نواز الدین صدیقی نے میرا کردار ادا کیا ہے لیکن مجھے یقین ہی نہیں آ رہا تھا، جب فلم دیکھی تو یقین آیا کہ فلم میں میرے جملے استعمال کئے گئے اور جگہ بھی ویسی ہی استعمال کی گئی۔ ان کا کہنا تھا کہ بجرنگی بھائی جان کے لئے میرا کردار ادا کرنے پر سلمان خان، ہدایت کار کبیر خان اور نواز الدین صدیقی کا بہت مشکور ہوں جن کی وجہ سے مجھے اتنی شہرت ملی کہ آج مجھے دنیا بھر سے ٹیلی فون آ رہے ہیں اور پزیرائی مل رہی ہے۔ میں سلمان خان یا بجرنگی بھائی جان کے خلاف کوئی کیس نہیں کررہا، مجھے جو شہرت ملی ہے وہ ایک پاکستانی ہونے کی حیثیت سے ملی ہے، میری سلمان خان سے اپیل ہے کہ فلم کی کامیابی میں میرا بھی حصہ ہے لہذا مجھے بھی کچھ معاوضہ دیا جائے۔ میں ایک غریب صحافی ہوں اس لئے عدالتی معاملات میں نہیں پڑنا چاہتا۔چاند نواب کا کہنا تھا کہ جن لوگوں نے میری غلطی والا ویڈیو کلب انٹرنیٹ پر ڈاؤن لوڈ کرکے میرے لئے گڑھا کھودنے کی کوشش کی اور 6 سال تک اچھی نوکری کی تلاش میں دربدر پھرتا رہا میں ان سب کو معاف کرتا ہوں۔ سیاستدان جب کسی لائیو پروگرام میں ایک دوسرے کو برا بھلا کہتے ہیں اور گلاس توڑتے ہیں تو ان کو تنقید کا نشانہ نہیں بنایا جاتا لیکن میری چھوٹی سی غلطی پر مجھے صحافت سے الگ کرنے کی کوشش کی گئی۔ ان کا کہنا تھا کہ عزت اور شہرت دینا اللہ کے ہاتھ میں ہے، آج اس مقام پر تمام صحافی دوستوں اور ماں کی دعاؤں سے پہنچا ہوں لیکن شہرت ملنے کے باوجود کبھی غرور نہیں کروں گا۔
سلمان خان یا کبیر خان سے ملاقات سے متعلق پوچھے گئے سوال پر چاند نواب کا کہنا تھا کہ یہ تو ایک بریکنگ نیوز ہے، جب کوئی اچھا چینل جوائن کروں گا تو یہ نیوز سب سے پہلے اسی چینل کو دوں گا۔ جس طرح سلمان خان کی خواہش ہے کہ وہ مجھ سے ملیں اسی طرح میری بھی ان سے ملنے کی خواہش ہے، سلمان خان سے بھی میری بات ہوئی تھی اور انھوں نے مجھے فلموں میں کام کی پیشکش بھی کی تھی لیکن میرے لئے میرا صحافتی پیشہ زیادہ اہمیت کا حامل ہے اور جو بھی فیصلہ کروں گا وہ سوچ سمجھ کر کروں گا۔