لاہور( این این آئی ، مانیٹرنگ ڈیسک)سی ایس ایس کی تیاری کیلئے ملتان سے لاہور آنے والی لڑکی کی پنکھے سے پھندا لگی لاش برآمد ہوئی ہے ،سی سی پی او نے واقعہ کی رپورٹ طلب کر لی ۔پولیس کے مطابق ملتان کی رہائشی لڑکی ندا نے پانچ روز قبل نواب ٹائون کے علاقے نشیمن

اقبال سوسائٹی میں فلیٹ کرائے پر لیا تھا۔ ندا کی دوست جب فلیٹ پر آئی تو ندا کی لاش پنکھے سے جھول رہی تھی ۔اطلاع ملنے پر پولیس موقع پر پہنچ گئی جس نے فرانزک ماہرین کی مدد سے جائے وقوعہ سے شواہد اکٹھے کرنے کے بعد لاش کو پوسٹمارٹم کیلئے مردہ خانے منتقل کر دیا۔سی سی پی او غلام محمود ڈوگر نے ایس پی صدر سے رپورٹ طلب کر لی ہے۔دوسری جانب پولیس کا کہنا ہے کہ ندا اکبر نے خود کشی سے پہلے گھر والوں کے نام ایک نوٹ لکھا ہے جس میں اس نے لکھا کہ میں سی ایس ایس کے امتحان میں دو دفعہ ناکام ہو چکی ہوں۔ میں گھر والوں کے لیے مزید بوجھ نہیں بننا چاہتی، اس لیے میں اپنی زندگی کا خاتمہ کر رہی ہوں۔علاوہ ازیں تھانہ مزنگ کے علاقہ میں معمولی جھگڑے پر گھر والوں نے 70 سالہ بوڑھی خاتون کے سر میں لوہے کے راڈ مار کر موت کے گھاٹ اتار دیا۔بتایا گیا ہے سفاکی کا یہ واقعہ تھانہ مزنگ کی حدود صفانوالہ والہ چوک میں پیش آیا جہاں معمولی جھگڑے پر گھر والوںنے 70 سالہ مسیحی خاتون کے سر پر راڈ سے وار کئے جس سے اس کی موت واقع ہو گئی ۔اطلاع ملتے ہی پولیس موقع پر پہنچ گئی جس نے قانونی کارروائی شروع کر کے لاش کو مردہ خانہ منتقل کر دیا ۔