لاہور (این این آئی) مسلم لیگ (ن) پنجاب کی سیکرٹری اطلاعات عظمی بخاری نے کہا ہے کہ راولپنڈی رنگ روڈ سکینڈل میں دو افسران کو قربانی کا بکرا بنایا گیا،اصل مگر مچھ آزاد گھوم رہے ہیں،ان پر ہاتھ ڈالتے ڈی جی اینٹی کرپشن کے پر جلتے ہیںکیونکہ ڈی جی صاحب پر

خود کیسیز ہیں۔ اپنے بیان میں انہوںنے کہاکہ ہر روز ایک نیا سکینڈل آتا ہے اور ہر روز اپنی اے ٹی ایمز کو بچایا جاتا ہے۔ڈی جی اینٹی کرپشن کہتے ہیں سیاسی شخصیات کو گرفتار کرنا ہمارے دائرہ اختیار میں نہیں آتا،نیب زدہ ڈی جی گوہر نفیس نے ہمارے منتخب ارکان اسمبلی کے گھروں پر چھاپے بھی مارے اور گرفتاریاں بھی کی۔عمران خان اور ان کے دوست نیب،ایف آئی اے اور اینٹی کرپشن کیلئے مقدس گائے ہیں۔راولپنڈی رنگ سکینڈل کے مرکزی ملزم وزیراعظم عمران خان اور وزیراعلی عثمان بزدار ہیں ۔رنگ روڈ سکینڈل میں غلام سرور،زلفی بخاری اور شیخ رشید کے نام بھی سرفہرست ہیں۔عمران خان چوروں اور ڈاکوں کے سہولت کار ہیں جبکہ بنی گالہ مافیا کی پناہ گاہ بن چکا ہے۔ڈی جی اینٹی کرپشن اگر اپنے حلف کی پاسداری نہیں کرسکتے تو استعفیٰ دے کر گھر چلے جائیں۔چیئر مین نیب،ڈی جی ایف آئی اے اور ڈی جی اینٹی کرپشن فرد واحد کے نہیں ریاست اور عوام کے خدمت گار بنیں۔