اسلام آباد (این این آئی)کیوبا نے پاکستان میں ویکسین کی تیاری کے لئے مرکز قائم کرنے کی پیش کش کی ہے جسے مقامی طور پر استعمال کرنے کے ساتھ ساتھ برآمد کے لئے بھی استعمال کیا جا سکے گا۔ کیوبا کے سفیر زینر جیویر گونزالیز نے وفاقی وزیر برائے سائنس و ٹیکنالوجی شبلی فراز سے ملاقات کے دوران یہ تجویز پیش کی۔ دونوں فریقین نے کورونا وبا کا مقابلہ کرنے کے لئے اپنی حکومتوں کی جانب سے لئے گئے اقدامات پر تبادلہ خیال بھی کیا۔وفاقی وزیر نے دونوں ممالک کے مابین مختلف شعبوں خصوصاً سائنس اور ٹیکنالوجی میں تعاون بڑھانے کی ضرورت پر زور دیا۔ انہوں نے کہا کہ زراعت ، پانی کے تحفظ اور بائیوٹیکنالوجی میں دونوں ممالک ایک دوسرے کے تجربات سے فائدہ اٹھا سکتے ہیں۔ انہوں نے کیوبا کی جانب سے پاکستانی طلبا کو دئیے جانے والے میڈیکل میڈیکل اسکالرشپ کے پروگرام کو بھی سراہا۔