حافظ آباد(نیوزڈیسک) پاکستان مسلم لیگ ضیاءکے سربراہ سابق وفاقی وزیر محمد اعجاز الحق نے کہا ہے کہ جوڈیشل کمیشن کا فیصلہ یہی آنا تھا جو آیا ہے۔ ہم نے اس کے بارے میں پہلے ہی کہہ دیا تھا۔ جوڈیشنل کمیشن نے جو فیصلہ دیا ہے اس کی روشنی میں اب تحریک انصاف کو چاہیے کہ وہ پارلیمنٹ میں آ کر اپنا کردار ادا کرے اور آنے والے انتخابات میں اصلاحات کی کوشش کریں اور جو اصلاحاتی کمیٹی بنی ہے اس میں بھی اپنا بھرپور کردار ادا کریں۔ جوڈیشل کمیشن کا فیصلہ ثبوتوں پر مبنی تھا ، پاکستان تحریک انصاف دیگر جماعتیں ثبوت فراہم کرنے میں ناکام رہی ہیں۔ صحافیوں کے ایک گروپ سے بات چیت کرتے ہوئے محمد اعجاز الحق نے کہا کہ قومی ایشوز پر تمام جماعتوں کو یکسوئی کے ساتھ کام کرنا چاہے اور دہشت گردی کے خلاف جنگ میں افواج پاکستان کی بھرپور حمایت کرنی چاہیے اور کراچی سمیت ہر جگہ دہشت گردی کے خلاف مہم میں کوئی سمجھوتہ نہیں ہونا چاہیے۔ ایک سوال کے جواب میں انہوںنے کہا کہ اب بھی سیاسی جماعتوں کے پاس موقع ہے کہ وہ کریمنل عناصر کو اپنی صفحوں سے نکال کر قومی ذمہ داری کا ثبوت دیں۔ انہوں نے کہا کہ یہ آپریشن کسی جماعت کے خلاف نہیں بلکہ بھتہ خوروں، اغواءبرائے تاوان اور دہشت گردوں کے خلاف ہو رہا ہے۔ انہوں نے کہا کہ چند جماعتوں نے کریمنل عناصر کو تحفظ دیا ہواتھا جنہیں اب اس آپریشن سے تکلیف پہنچ رہی ہے۔