اسلام آباد (مانیٹرنگ ڈیسک) پاکستان کے عسکری ذرائع نے جموں ایئر بیس ڈرون حملے کو بھارتی حکومت کا پلوامہ ٹو قرار دیدیا ہے اور اسے انڈیا میں بی جے پی پالیسیوں کی ناکامیوں پر مٹی ڈالنے کی ایک کوشش قرار دی ہے،روزنامہ جنگ میں حنیف خالد کی خبر کے مطابق بھارت میں مودی حکومت کووڈ 19 (کورونا) سے نمٹنے سے کم وبیش 4 لاکھ اموات کی دنیا بھر میں ذمہ دار قرار دی گئی
ہے۔انڈین میڈیا بھی اپنی حکومت کی کورونا وباء سے نمٹنے میں مسلسل ناکامیوں پر پردہ نہیں ڈال سکا،کلکتہ سے امرتسر اور مینرورام سے راجھستان تک کورونا کی وباء میں مبتلا ہونے والے لاکھوں بھارتیوں کو ویکسین تو کجا آکسیجن نہ ملنے کی وجہ سے ہزاروں نہیں کئی لاکھ انڈین فٹ پاتھوں، سڑکوں پر دم توڑتے رہے اور جن کی چتا کو جلانے کیلئے شمشان گھاٹوں میں لکڑی تک ناپید ہوگئی اور ہندوستان اموات کے لحاظ سے دنیا کا نمبر ون ملک بنا ہوا ہے۔نئی دہلی میں چند روز قبل گپکار الائنس (پی اے جی ڈی) جس میں کشمیری کی حقیقی سیاسی قیادت تو شریک نہیں ہوئی تاہم چند لوگ ضرور آئے کیونکہ کشمیریوں کی حقیقی قیادت نے بھارتی آئین کے آرٹیکل 370 جسے 5 اگست 2019 کو یکطرفہ طور پر انڈین آئین سے خارج کیا گیا، اسے آئین میں دوبارہ شامل کرنے تک مقبوضہ جموں و کشمیر کی معروف سیاسی قیادت نے مودی حکومت کے ساتھ کام کرنے سے دو ٹوک انکار کیا ہے۔آزاد جموں کشمیر میں تحریک انصاف کے مرکزی لیڈر سردار تنویر الیاس نے ایک بیان میں کہا کہ بھارت کی جانب سے سے جموں میں بھارتی ایئر فورس کے بیس پر ہونے والے حملے پر پاکستان کو ملوث کرنا ایک انتہائی بزدلانہ حرکت ہے جو بھارتی حکومت کی بوکھلاہٹ اور ناکامیوں کا منہ بولتا ثبوت ہے ۔
