کولمبو(نیوز ڈیسک) پانچ ایک روزہ میچوں کی سیریز کے چوتھے میچ میں سری لنکا کی پاکستان کے خلاف بیٹنگ جاری ہے۔کولمبو کے پری ما داسا اسٹیڈیم میں کھیلے جا رہے میچ میں سری لنکا نے پاکستان کے خلاف ایک وکٹ کے نقصان پر 12 اوورز میں 58 رنز بنا لئے ہیں۔ سری لنکا کی جانب سے کوشال پریرا اور تلکا رتنے دلشان نے اننگز کا آغاز کیا لیکن پریرا پہلے ہی اوور کی دوسری گیند پر آو¿ٹ ہو گئے۔ دلشان کے ساتھ لہیرو تھری مانے وکٹ پر موجود ہیں۔قبل ازیں قائد اینجلو میتھیوز نے ٹاس جیت کر پہلے خود بیٹنگ کا فیصلہ کیا۔ آئی لینڈر قائد کا کہنا تھا کہ وکٹ بہت اچھی دکھائی دے ریی ہے، آج کا میچ جیت کر سیریز میں واپس آنا چاہتے ہیں۔ سری لنکن ٹیم میں 2 تبدیلیاں کی گئی ہیں۔پاکستان کے کپتان اظہر علی کا کہنا تھا کہ ٹاس جیتنے یا ہارنے سے فرق نہیں پڑتا، ہم پہلے سے ہی اس صورت حال کے لئے تیار تھے، آج کے میچ کے لئے گزشتہ میچ جیتنے والی ٹیم کو ہی برقرار رکھنے کا فیصلہ کیا ہے۔