لاہور(این این آئی) مسلم لیگ(ن)پنجاب کی سیکرٹری اطلاعات عظمی بخاری نے کہا ہے کہ سیالکوٹ کا شیطانی چرخہ لاہور میں گند نہ ڈالے،آپ کی زبان اور ہاتھوں سے نہ کوئی عورت محفوظ ہے نہ کوئی مرد۔ اپنے بیان میں انہوںنے کہا کہ نوازشریف،شہبازشریف اور مریم نواز کے متعلق آپ کے الفاظ کم ظرفی اور گھٹیا ذہنیت کی

عکاسی کرتے ہیں،اگر آپ نے مریم نواز کے متعلق آئندہ ایسے الفاظ استعمال کیے تو ہم بشری بیگم کو پاکپتن اور آپ کو سیالکوٹ واپس چھوڑ کے آئیں گے۔محترمہ اپنی عزت اپنے ہاتھ میں ہوتی ہے شاید آپ کو عزت راس نہیں ہے،ہم آپ کو باجی کہیں اور آپ مریم نواز کے بارے میں زبان درازی کریں ایسا نہیں ہو سکتا۔واضح رہے کہ وزیراعلیٰ پنجاب عثمان بزدار کی معاون خصوصی برائے اطلاعات ڈاکٹر فردوس عاشق اعوان نے کہا ہے کہ ن لیگ سن لے جعلی راجکماری کے بعد اب جعلی خادم اعلیٰ کی گھسی پٹی فلم نہیں چلے گی۔فردوس عاشق اعوان نے اپنے ایک بیان میں کہا کہ ’’بھگوڑے ہدایت کار‘‘ لندن میں پولو میچ کے مزے لے رہے ہیں،جبکہ ’’خاموش فلمساز‘‘ رائے ونڈ میں بیٹھی ہیں۔وزیراعلیٰ پنجاب کی معاون خصوصی نے کہا کہ ش لیگ کا ٹولہ جعلی خادم اعلیٰ کے غبارے میں ہوا بھر رہا ہے،ش لیگ کو علم ہونا چاہیے کہ پرچی شہزادے نے ہر ایک کی پیٹھ میں چھرا گھونپا ہے۔انہوں نے کہا کہ پرچی شہزادہ پہلے ہی جعلی راجکماری اور مولانا کے ساتھ ہاتھ کرچکا ہے،اب جعلی خادم اعلیٰ کی باری ہے۔فردوس عاشق نے مزید کہا کہ پرچی شہزادے اورجعلی خادم اعلیٰ کی ’’جعلی محبت‘‘ کا انجام دنیا دیکھے گی ۔