ریاض(این این آئی) سعودی عرب میں ایوان شاہی کے مشیر شیخ ناصر بن عبدالعزیز الشثری مختصر علالت کے بعد انتقال کرگئے۔سعودی ذرائع ابلاغ کے مطابق شیخ الشثری کی نماز جنازہ گزشتہ روز جمعہ عصر کی نماز کے بعد ادا کی گئی جس میں مرحوم کے عزیز و اقارب سمیت ایوان شاہی کی دیگر معزز شخصیات نے شرکت کی۔شیخ ناصر الشثری بادشاہوں کے مشیر کے لقب سے جانے جاتے تھے۔ وہ شاہ خالد بن عبدالعزیز آل سعود کے دور سے ایوان شاہی میں مشیر کے طور پرمقرر ہوئے۔بعد ازاں شیخ ناصر الشثری نے شاہ فہد بن عبدالعزیز اور شاہ عبداللہ بن عبدالعریز اور شاہ سلمان بن عبدالعزیز کے مشیر کے طور پر بھی اپنی خدمات انجام دیں۔خادم حرمین شریفین شاہ سلمان بن عبدالعزیز آل سعود اور ولی عہد مملکت شہزادہ محمد بن سلمان بن عبدالعزیز نے شیخ الشتری کی ایام علالت میں ان کی عیادت بھی کی تھی۔مرحوم کے اہل خانہ کی اطلاع کے مطابق شیخ الشثری کو بوقت عصر کے بعد نماز جنازہ ریاض کے العود قبرستان میں سپرد خاک کردیا گیا۔