اسلام آباد،تربیلا ، گوجرانوالہ(مانیٹرنگ ڈیسک ،این این آئی) وفاقی وزیر برائے توانائی حماد اظہر نے نجی ٹی وی سے گفتگو کرتے ہوئے کہا ہے کہ اس وقت طلب کے مقابلے میں صرف 593 میگاواٹ کا شارٹ فال ہے جس پر کل تک قابو پالیں گے ۔دوسری جانب وزارت توانائی نے
بھی کہا ہے کہ بجلی کا شاٹ فال 593 میگا واٹ ریکارڈ کیا گیا، مانیٹرنگ اور ضروری اقدامات کے باعث شاٹ فال میں کمی ہوئی ہے۔اپنے بیان میں وزارت توانائی نے بتایا کہ جمعرات کی صبح ساڑھے 8 بجے بجلی کی طلب 22 ہزار 393 میگا واٹ تھی، پیداوار 21 ہزار 800 میگا واٹ ریکارڈ کی گئی۔وزارت توانائی کے مطابق تربیلا کا ٹنل 3 بھی فعال ہوگیا ہے جس سے بجلی کی پیداوار بڑھ رہی ہے، صرف ہائی لاسز والے علاقوں میں ضرورت کے مطابق لوڈ مینجمنٹ کی جا رہی ہے۔دریں اثنا تربیلا ڈیم میں مٹی آجانے سے بجلی کی پیداوار بند ہوگئی، مشینری کو بھی نقصان پہنچنے کا خدشہ ہے، ذرائع کے مطابق تربیلا سے ہی 4 ہزار میگاواٹ سے زائد پیداوار میں کمی کا سامنا ہے اس صورتحال کے سبب لاہور سمیت پنجاب بھر میں غیر اعلانیہ لوڈشیڈنگ عروج پر پہنچ گئی ہے۔علاوہ ازیں گوجرانوالہ میں گرمی کی شدت کے پیش نظر ٹریفک پولیس نے عوام کی خدمت کیلئے ٹریفک سگنلز پر شربت کی سبیلیں لگا دیں جس کے بعد چالان کے ساتھ ٹریفک پولیس اہلکار شہریوں کو ٹھنڈا اور میٹھا شربت بھی پلائیں گے اس حوالے سے چیف ٹریفک پولیس آفیسر نے کہا کہ گرمی میں اہلکاروں نے دوران ڈیوٹی شربت کی سہولت کا کہا تھا۔چیف ٹریفک پولیس آفیسر نے کہا کہ ہم نے مخیرحضرات کے تعاون سے اہلکاروں اور شہریوں کو شربت پلانے کا فیصلہ کیا۔
