لاہور (نیوز ڈیسک) پاکستان چیمپئنز ٹرافی کے لیے کوالیفائی کرنے سے صرف ایک فتح کی دوری پر رہ گیا ہے اور مزید ایک میچ میں فتح اسے نہ صرف سیریز میں کامیاب بنا دے گی بلکہ چیمپئنز ٹرافی میں شرکت کا پروانہ بھی تھما دے گی۔تفصیلات کے مطابق پاکستانی ٹیم، سری لنکا کو تیسرے ون ڈے میں شکست دینے کے بعد آئی سی سی ون ڈے رینکنگ میں اپنی پوزیشن مستحکم کر چکی ہے۔ اس فتح سے قومی ٹیم کو آئی سی سی سی رینکنگ میں مزید دو پوائنٹس ملیں گے جس سے اس کے مجموعی پوائنٹس 87 سے بڑھ کے 89 ہو جائیں گے اور یہ ویسٹ انڈیز سے ایک درجہ اوپر آٹھویں پوزیشن پر آ جائے گا۔ اگر پاکستان سری لنکا کے خلاف چوتھا میچ جیت گیا تو سیریز تین ایک سے اس کے نام ہو جائے گی اور اسی کے ساتھ ہی 2017 میں ہونے والی چیمپئنز ٹرافی میں اس کی شرکت کی راہ بھی ہموار ہو جائے گی۔ واضح رہے کہ ایونٹ میں شرکت کیلئے ضروری ہے کہ پاکستان ون ڈے رینکنگ میں پہلی آتھ میں سے کسی ایک پوزیشن پر ہو۔ جو آتھ ٹیمیں 30 ستمبر 2015 تک رینکنگ میں پہلی آتھ پوزیشنز پر ہوں گی، وہی ایونٹ کیلئے کوالیفائی کریں گی۔