کالام، بہاولپور، راولپنڈی (این این آئی)کالام کے علاقے لائیکوٹ میں گلیشئر گرنے سے بحرین کالام روڈ ہر قسم کی آمدورفت کیلئے بند ہو گیا۔سڑک بند ہو نے سے مقامی لوگوں کے ساتھ ساتھ سیاحوں کو بھی مشکلات کا سامنا کر نا پڑا، سوات کے میدانی علاقوں میں تین روزسے

وقفے وقفے سے بارش اور کالام اور مالم جبہ میں وقفے وقفے سے برفباری کا سلسلہ جاری رہا ،بارش و برفباری کے بعد سردی کی شدت میں مزید اضافہ ہو گیا ۔دوسری جانب بہاولپور کے ڈسٹرکٹ حاصل پور کے قریب پیٹرول پمپ پر آسمانی بجلی گرنے کے سبب آگ گئی ۔ریسکیو ذرائع کے مطابق پیٹرول پمپ پر گرنے والی آسمانی بجلی کے سبب آگ لگنے سے لاکھوں روپے کا پیٹرول جل گیا اور عمارت شدید متاثر ہوئی ہے۔ریسکیو ذرائع کے مطابق کئی گھنٹوں بعد آگ پر قابو پا لیا گیا ۔علاوہ ازیں واٹر اینڈ سینیٹیشن ایجنسی (واسا)راولپنڈی نے مزید بارشوں کے پیش نظرہائی الرٹ جاری کردیا ۔ ایم ڈی واسا راجہ شوکت محمود نے کہاکہ رات کی طوفانی بارش 45 ملی میٹر سے زائد بریکارڈ کی گئی، محکمہ موسمیات سے بہترین کوارڈینیشن کیوجہ سے واسا راولپنڈی رات گئے پہلے ہی الرٹ تھا۔ ایم ڈی واسا راجہ شوکت نے نشیبی علاقوں اور شاہراہوں سے نکاسی آب آپریشن کی نگرانی کی ،بارش سے اولڈ ائیرپورٹ روڈ، مری روڈ، لیاقت باغ، کمیٹی چوک انڈر پاس، وارث خان، رحمان آ باد جامع مسجد روڈ، صادق آ باد اور دیگر علاقے متاثر ہوئے تھے۔