پشاور (مانیٹرنگ ڈیسک) نوشہرہ میں تحریک انصاف کے امیدوار کی شکست کا معاملہ، نجی ٹی وی چینل کا کہنا ہے کہ تحریک انصاف کے رہنمااور صوبائی وزیر لیاقت خٹک کو لیگی امیدوار اختیار ولی کی حمایت پر عہدے سے ہٹا دیا گیا۔ وزیراعلیٰ خیبرپختونخوا نے لیاقت خٹک کو وزیر آبپاشی کا عہدہ فوری طور پر چھوڑنے کی ہدایات

کر دی ہیں اس کے علاوہ انہیں صوبائی کابینہ سے بھی فارغ کر دیا گیا ہے۔ دوسری جانب صوبائی وزیر شوکت یوسفزئی کا کہنا ہے کہ نوشہرہ میں تحریک انصاف کو تحریک انصاف نے ہرایا، نوشہرہ میں شکست اندرونی اختلافات کا نتیجہ ہے، صوبائی وزیر نے تحریک انصاف میں اندرونی اختلافات کو تسلیم کر لیا۔یاد رہے کہ خیبرپختونخوا اسمبلی کے حلقہ پی کے 63 نوشہرہ کے ضمنی الیکشن میں مسلم لیگ ن کے امیدوار اختیارولی نے کامیابی حاصل کرلی ہے،تحریک انصاف کے امیدوارمیاں عمر کاکاخیل دوسرے نمبر پر آئے ہیں، خیبرپختونخوا اسمبلی کے حلقہ پی کے 63 کے تمام 102 پولنگ اسٹیشنز کے غیر حتمی اورغیرسرکاری نتائج کے مطابق مسلم لیگ (ن) کے اختیار ولی 21 ہزار 122 ووٹ لیکر پہلے نمبر پر آئے جبکہ پی ٹی آئی کے میاں عمر 17 ہزار 23 ووٹ حاصل کیے۔ حتمی نتیجے الیکشن کمیشن جاری کرے گا۔پی کے 63 نوشہرہ میں 102پولنگ اسٹیشن قائم کیے گئے تھے۔ پولنگ اسٹیشن 44 پر پولنگ تقریباً ایک گھنٹہ تاخیر سے شروع ہوئی، پولنگ کے دوران نوشہرہ میں ایس اوپیزپربھی سختی سے عمل نظرآیا۔ یہ نشست سابق صوبائی وزیرمیاں جمشید الدین کاکاخیل کے انتقال کے باعث خالی ہوئی تھی۔

موضوعات:کابینہ سے فارغ