اسلام آباد(آن لائن ) وفاقی حکومت نے ڈینیل پرل قتل کیس میں فریق بننے کا فیصلہ کرلیا ہے اور وفاقی حکومت سپریم کورٹ سے نظرثانی کیس میں لارجر بینچ تشکیل دینے کی بھی استدعا کرے گی۔اٹارنی جنرل پاکستان کی جانب سے جاری کیے گئے اعلامیے میں کہا گیا ہے کہ وفاقی حکومت ڈینئل پرل قتل کیس کے ملزمان کی رہائی
کے خلاف نظر ثانی درخواست میں فریق بننے کیلئے جلد درخواست دائر کرے گی۔ وفاقی حکومت کیس میں فریق بننے کے بعد معزز عدالت سے نظر ثانی کیلئے لارجر بینچ تشکیل دینے کی بھی استدعا کرے گی۔ اعلامیے میں مزید کہا گیا ہے کہ وفاقی حکومت سنگین جرم کے قصورواروں کو انصاف کے کٹہرے میں لانے کیلئے صوبائی حکومت سے مکمل تعاون کرے گی۔ سپریم کورٹ نے 28 جنوری کو ڈینیئل پرل قتل کیس کے چار ملزمان کو عدم شواہد کی بنا پر بری کرنے کا ہائیکورٹ کا فیصلہ درست قرار دیا تھا جس پر سندھ حکومت پہلے ہی نظر ثانی کی اپیل دائر کر چکی ہے۔دریں اثناء سپریم کورٹ میں ڈینئل پرل قتل کیس میں احمد عمر شیخ کی بریت کے خلاف سندھ حکومت کی نظر ثانی درخواست سماعت کے لیے مقرر کردی گئی۔جسٹس عمرعطا بندیال کی سربراہی میں تین رکنی بنچ یکم فروری کو کیس کی سماعت کرے گا۔خیال رہے کہ پہلے سندھ ہائیکورٹ نے عمر شیخ کو فوری رہا کرنے کا حکم دیا تھا جس کے خلاف سندھ حکومت نے سپریم کورٹ سے رجوع کیا تھا۔سپریم کورٹ کے جج جسٹس مشیرعالم کی سربراہی میں قائم بینچ نے بھی ملزمان کی فوری رہائی کا حکم دیا تھا جس کیخلاف سندھ حکومت نے نظر ثانی کی درخواست دی ہے۔
