لاہور/اسلام آباد(نیوزڈیسک) پاکستان مسلم لےگ کے صدر و سابق وزےراعظم چودھری شجاعت حسےن نے کہا ہے کہ نیب کی لسٹ میں دئیے گئے 150کیسز کے فوری اور سمری ٹرائل کیلئے سپریم کورٹ کمیشن تشکیل دے جو کھلی سماعت کے بعد 12گھنٹے میں فیصلہ سنا دے۔ نیب کی جاری کردہ لسٹ کے حوالے سے الیکٹرانک اور پرنٹ میڈیا کے مختلف نمائندوں کی جانب سے پوچھے گئے سوالات کے جواب میں چودھری شجاعت حسین نے کہا کہ میری تجویز پر اگر عمل کر لیا جائے تو ہمیشہ کیلئے یہ ایشو ختم ہو جائے گا۔ انہوں نے کہا کہ مجوزہ کمیشن میں سماعت کا آغاز صبح 9بجے سے شروع ہو اور رات 9بجے تک اس کا فیصلہ دے دیا جائے، کمیشن کی تمام کارروائی کی لائیو کوریج ہو اور عوام کو تمام تر کارروائی دیکھنے کی اجازت ہو۔ ایک اور سوال پر انہوں نے کہا کہ نیب کی لسٹ میں دئیے گئے 150کیسز کو فلٹر کر کے سنجیدہ ترین کیسز کی ہیئرنگ شروع کر دی جائے تو یہ معاملہ احسن طور پر طے ہو گا۔ چودھری شجاعت حسین نے کہا کہ میں آفر کرتا ہوں کہ سب سے پہلے میرا ٹرائل کیا جائے تو دودھ کا دودھ پانی کا پانی ہو جائے گا۔