کراچی(این این آئی)اسٹیل مل نے مختلف مصنوعات کی قیمتوں میں5تا12ہزار روپے فی ٹن تک اضافہ کردیا جس کے باعث پہلے سے مصنوعات کی خریداری کیلئے رقم ادا کرنیوالے ڈیلرز پر اضافی مالی بوجھ پڑنے کا خدشہ ہے ۔ تفصیلات کے مطابق اسٹیل مل کے مارکیٹنگ

ڈپارٹمنٹ نے بلٹس کی مختلف اقسام، ہاٹ رولڈ مصنوعات،امیونیم سلفیٹ،کولڈ رولڈ مصنوعات ، ایم ایس تھک پلیٹس،یو چینلز،ایم ایس سلیب،ہارڈ کوک،بائی پراڈکٹس،تار کول،استعمال شدہ ڈیزل ،آکسیجن /نائٹروجن اور رنر اسکریپ سمیت دیگر مصنوعات کی قیمتوں میں اضافے کا نوٹیفکیشن جاری کردیا ہے ،نوٹیفکیشن کے مطابق مذکورہ مصنوعات کی قیمتوں میں اضافے کا اطلاق 25نومبر سے نافذ العمل ہوگا، بلٹس کے تمام گریڈ کی قیمتوں میں اضافہ کیا گیا ہے اور پرائم گریڈ بلٹس کی نئی قیمتیں 93,829 روپے سے لے کر 129,600روپے فی ٹن تک مقرر کی گئی ہیں۔اسٹیل مل کی جانب سے مصنوعات کی قیمتوں میں اضافے کے بعد پہلے سے ان مصنوعات کی خریداری کیلئے ادائیگی مکمل کرنے والے ڈیلرز حضرات اس نئی صورتحال سے پریشان ہوگئے ہیں اور ان کا اسٹیل مل حکام سے کہنا ہے کہ وصول کردہ پے آرڈرز پر مصنوعات کی سپلائی کیلئے اضافہ کی گئی رقم وصول نہیں کی جائے ،دوسری جانب اسٹیل مل ذرائع کا کہنا ہے کہ مصنوعات میں اضافہ مارکیٹ کے مطابق کیا گیا اور اس کے نتیجے میں ادارے کی آمدن میں خاطر خواہ اضافہ ہوگا۔

موضوعات:اسٹیل مل کی مختلف مصنوعات