لاہور( این این آئی) مسلم لیگ (ن) نے پی پی 139کے صدر فیصل کھگ نے میاںجلیل احمد شرقپوری سے استعفے کا مطالبہ کرتے ہوئے کہا ہے کہ 2018کے الیکشن سے قبل جلیل احمد شرقپوری خود رانا تنور کے پاس پارٹی میں شمولیت کیلئے گئے
اورمسلم لیگ(ن)کے پلیٹ فارم سے الیکشن لڑنے کی درخواست کی ، رانا تنویر کے درخواست پر شہبازشریف نے جلیل شرقپوری کو پارٹی ٹکٹ دیا۔ پریس کلب میں دیگر رہنمائوں کے ہمراہ پریس کانفرنس کرتے ہوئے انہوں نے کہا کہ جلیل شرقپوری چند ماہ قبل نوازشریف کی تعریفیں کرتے تھے اورانہیںپاکستان کا سب سے بہترین لیڈر قراردیا،آج جلیل شرقپوری اپنے محسن کیخلاف بیانات دے رہے ہیں۔ انہوں نے کہا کہ جلیل شرقپوری کو ورغلایا گیا ہے اس لیے وہ نوازشریف کیخلاف بیان دے رہے ہیں،جلیل شرقپوری کو اگر نوازشریف کا بیانیہ پسند نہیں تو وہ مستعفی ہو جائیں، اگر ان کو پی ٹی آئی میں شامل ہونے کا شوق ہے تو دوبارہ الیکشن لڑیں، ہم کسی لوٹے کو سپورٹ نہیں کرسکتے، اگر میاں جلیل شرقپوری نے استعفیٰ نہ دیا تو ان کے گھر کے باہر دھرنا دینگے اور جلیل شرقپوری کا گھیرا ئوبھی کرینگے۔
