ملتان (این این آئی)وزیر خارجہ شاہ محمود قریشی نے کہا ہے کہ نواز شریف کی واپسی کے لیے برطانیہ کے ہائی کمشنر سے نشستیں ہوئی ہیں، ان کی واپسی کیلئے برطانوی حکومت کو لکھ کر دیا ہے، برطانیہ اور عدالتیں پاکستان کے موقف سے آگاہ ہیں۔

میڈیا سے گفتگو کرتے ہوئے شاہ محمود قریشی نے کہا کہ نواز شریف کی صحت بھی بہتر ہے، اخلاقیات کا تقاضا بھی ہے کہ وہ واپس آئیں۔شاہ محمود قریشی نے کہا کہ اپوزیشن چاہتی ہے کہ اسٹیبلشمنٹ آئین سے ماورا ان کیلئے آسانیاں پیدا کرے۔انہوں نے کہا کہ قومی اداروں پر حملہ پاکستان کے مفاد میں نہیں ہے، کسی کے لیے نہ این آر او کا ارادہ تھا نہ ہے اور نہ ہوگا۔وزیر خارجہ نے کہا کہ ن لیگ کا ایک بڑا عنصر سیاسی مجبوری کے باعث پارٹی قیادت کے بیانیہ سے اختلاف کا اظہار نہیں کرسکتا، لیکن انہیں پتہ ہے کہ وہ بند گلی میں داخل ہوگئے ہیں۔