کراچی(نیوزڈیسک)پاکستانی اسٹاک مارکیٹ ،غیرملکی سرمایہ کار وں کی موجیں ہوگئیں،کراچی اسٹاک مارکیٹ میں زبردست تیزی کے باوجود غیر ملکی سرمایہ کاروں نے منافع کمانے کے لیے حصص فروخت کرنے کو ترجیح دی ، گزشتہ ہفتے کے دوران غیرملکی سرمایہ کاروں نے اسٹاک مارکیٹ میں15لاکھ97ہزار ڈالر مالیت کے حصص فروخت کرکے سرمایہ مارکیٹ سے نکال لیا، تاہم مقامی سرمایہ کار اور انسٹی ٹیوشنز کی جانب سے حصص کی بڑے پیمانے پر خریداری کی گئی جس کی وجہ سے کراچی اسٹاک مارکیٹ میں زبردست تیزی رہی اور کے ایس ای100انڈیکس1571.22پوائنٹس کے اضافے سے تاریخ میں پہلی بار35456.35پوائنٹس کی بلند ترین سطح پر بند ہوا، غیرملکی سرمایہ کاروں کی عدم دلچسپی کے باعث تجارتی سرگرمیوں میں کمی آگئی اور اوسطاً روزانہ کاروباری حجم0.5فی صد کی کمی سے35کروڑ57لاکھ حصص ہوگیا جبکہ اس سے پہلے ہفتے کے دوران اوسطاً روزانہ35کروڑ76 لاکھ حصص کا لین دین ہوا تھا، اوسط روزانہ کاروباری مالیت19.9فی صد کے اضافے سے13ارب19کروڑ روپے ہوگئی، مارکیٹ میں مجموعی سرمایہ کاری280ارب روپے کے اضافے سے7602ارب روپے ہوگئی، گزشتہ ہفتے کے دوران زیادہ کاروبار کنسٹرکشن اینڈ میٹریل ، الیکٹریسٹی، بینکنگ، کیمیکلز اور آئل اینڈ گیس سیکٹرز میں ہوا، کنسٹرکشن اینڈ میٹریل سیکٹر میں مجموعی کاروبارکا17فی صد لین دین ہوا جبکہ الیکٹریسٹی میں11فی صد، بینکنگ میں10فی صد، کیمیکلز میں7فی صد اور آئل اینڈ گیس سیکٹر میں6فی صد کاروبار ہوا، اس ہفتے کے دوران خطے کی دیگر مارکیٹوں میں سے چین، فلپائن اور تائیوان کی مارکیٹیں بالترتیب12.1فی صد،1.1فی صد اور1.1فی صد کمی کے ساتھ منفی زون میں بند ہوئیں تاہم انڈیا، انڈونیشیا، کوریا اور ملائیشیا کی مارکیٹیں بالترتیب1.0فی صد،1.2فی صد،0.7فی صد اور1.4فی صد اضافے سے مثبت زون میں بند ہوئیں۔