لاہور(نیوزڈیسک)آل پاکستان انجمن تاجران نے بینکوں میں لین دین پر عائد صفراعشاریہ چھے فیصد لیوی ٹیکس کو مسترد کرتے ہوئے
منگل کو ملک بھر میں ہڑتال کا اعلان کر دیا ہے حکومت فوری طور پر عائد صفراعشاریہ چھے فیصد لیوی ٹیکس کو واپس لے و ر نہ تاجر بینکوں میں پیسہ جمع نہیں کروائیں گے ہفتہ کے روز لاہور پریس کلب میں آل پاکستان انجمن تاجران نے پریس کانفرنس کرتے ہوئے کہا ہے کہ حکومت کی طرف سے نئے مالی سال دو ہزار پندرہ سے دو ہزار سولہ میں بینکوں میں رقم جمع کروانے یا نکلوانے پر صفراعشاریہ چھے فیصد لیوی ٹیکس عوام کے پیسوں پر کھلا ڈاکہ ہے ایف بی آر کی طرف سے کھاتہ داروں کے اکاونٹس تک رسائی سے کاروبارتباہ ہو جائیں گے اگر حکومت نے اس ٹیکس کو واپس نہ لیا تو اس کے رد عمل میں تاجر بینکوں میں پیسہ جمع نہیں کروائیں گے اور لوگ پیسہ اپنے گھروں میں رکھیں گے جس سے نہ صرف تاجروں بلکہ بینکوں کا نظام بھی درہم برہم ہوجائے گا انہوں نے کہا کہ حکومت اس وقت ٹیکس ریونیو میں اضافہ کرنے کیلئے ودہولڈنگ ٹیکسوں پر زیادہ انحصار کر رہی ہے جو بہتر اپروچ نہیں ہے کیونکہ اس سے دستاویزی معیشت کی بجائے نقدی معیشت کو زیادہ فروغ ملے گا اور انفارمل معیشت کی حوصلہ افزائی ہو گی جو ملکی مفاد میں نہیں ہے۔انہوںنے کہا کہ مذکورہ ٹیکس کے نفاذ سے عوام کیلئے مہنگائی میں بھی اضافہ ہو گا کیونکہ اس ٹیکس کا بوجھ آخر کار عام صارف کو منتقل کر دیا جائے گا آل پاکستان انجمن تاجران نے وزیراعظم نواز شریف اور وزیرخزانہ اسحاق ڈارسے سات روز میں ٹیکس واپس لینے کا مطالبہ کیا ہے