مکہ مکرمہ،مدینہ منورہ(آن لائن) 7 ماہ کی عارضی معطلی کے بعد آج سے محدود عمرہ شروع ہو گیا۔ حرم کعبہ کے درودیوار لبیک اللہم لبیک کی صدائوں سے گونج اٹھے۔سعودی وزارت حج و عمرہ نے کہا ہے کہ ایک لاکھ 8 ہزار سے زیادہ عمرہ اجازت نامے جاری کر دیے گئے۔ 42 ہزار 873 سعودی شہریوں اور 65 ہزار 128غیرملکیوں کو اجازت نا موں کا اجرا کیا گیا ۔ وزارت
حج نے بتایا کہ ایک ہفتے کے اندر تین لاکھ 10 ہزار سعودی شہریوں اور مقیم غیرملکیوں نے اندراج کرا لیا۔ ان میں سے دو لاکھ 55 ہزار اصل ہیں اور 85 ہزار اہل و عیال ہیں۔ اندراج کرانے والوں میں 35 فیصد ایسے ہیں جن کی عمر 60 برس سے زیادہ ہے۔ 26 فیصد کی عمریں 31 سے 40 برس کے درمیان ہیں جبکہ 17 فیصد 20 سے 30 برس، 14 فیصد 41 سے 50 برس کے ہیں۔ 8 فیصد وہ ہیں جن کی عمریں 51 سے 60 برس کے درمیان ہیں۔ مسجد الحرام انتظامیہ نے عمرہ زائرین کے استقبال کا چار نکاتی پروگرام جاری کرتے ہوئے کہا ہے کہ کم از کم ایک ہزار کارکن اس پر عمل درآمد میں حصہ لیں گے۔ طواف صرف دو لائنوں میں ہوگا۔ سو افراد 15 منٹ میں ساتوں چکر مکمل کرلیں گے۔ ایک گھنٹے میں 4 سو افراد 7 چکر لگا سکیں گے۔ اس طرح ایک دن میں 6 ہزار افراد ا?سانی سے عمرہ کریں گے۔ تیسری لائن بھی کھولی جاسکتی ہے جس میں 150 افراد ہوں گے۔ یہ 15 منٹ میں سات چکر لگاسکیں گے۔ اس کی بدولت طواف کرنے والوں کی فی گھنٹہ تعداد چھ سو تک پہنچ جائے گی۔ اس طرح 6 ہزار افراد ہر دس گھنٹے میں طواف مکمل کرسکیں گے۔ دوسری جانب مسجد نبوی شریف انتظامیہ نے کہا ہے کہ اتوار یکم ربیع الاول بمطابق 17 اکتوبر کو زائرین یکم ربیع الاول 17 اکتوبر کو زائرین روضہ اطہر پر بھی درود و سلام کیساتھ حاضری دے سکیں گے۔روضہ اطہر میں نماز کی ادائیگی اور زیارت کے لیے ’اعتمرنا‘ ایپ سے اجازت نامہ حاصل کرنا ہوگا۔روضہ اطہر میں گنجائش کے حساب سے 75 فیصد لوگوں کو داخلے کی اجازت ہوگی ۔
