لاہیور(این این آئی) نیب حکام نے گرفتاری کے بعد مسلم لیگ (ن) کے صدر شہباز شریف کا ابتدائی میڈیکل چیک اپ کر لیا۔ابتدائی میڈیکل چیک اپ میں شہبازشریف کی ہاٹ بیٹ، بلڈ پریشر، اور شوگر چیک کی گئی ۔ شہبازشریف کے تینوں ابتدائی میڈیکل چیک اپ ٹیسٹ نارمل آئے۔
نیب حکام نے شہباز شریف کو اپنی روزانہ کی ادویات منگوانے کی اجازت دیدی۔دریں اثنا مسلم لیگ (ن) کے صدر شہبازشریف کی گرفتاری پر مسلم لیگ (ن) نے پنجاب اسمبلی میں قرارداد جمع کروا دی۔مسلم لیگ (ن) کے رکن اسمبلی مرزا محمد جاوید کی جانب سے جمع کروائی گئی قرار داد کے متن میں کہاگیا ہے کہ مسلم لیگ (ن )کے صدر شہبازشریف کی گرفتاری کی شدید مذمت کرتے ہیں۔سلیکٹڈ حکومت اور نیب نیازی گٹھ جوڑ کی انتقامی کارروائیوں کے خلاف سراپا احتجاج ہیں۔ نیب کی جانب سے قائم کردہ جھوٹیمقدمات کی بھی پرزورمذمت کرتے ہیں۔ حکومت سیاسی جماعتوں کو کچلنے کیلئے ہر گھٹیاحربہ استعمال کررہی ہے۔ حکومت بوکھلاہٹ کا شکار ہے اور اپوزیشن کو انتقامی کارروائیوں کا نشانہ بنا رہی ہے۔
