انبالہ (آن لائن) بھارت نے فرانس سے حاصل کردہ پانچ رافیل جنگی طیاروں کو باضابطہ طور پر اپنی فضائیہ میں شامل کر لیا ۔ انبالہ ایئر بیس پر شاندار تقریب کے دوران انہیں ‘گولڈن ایرو’ نامی 17ویں اسکواڈرن میں شامل کیا گیا۔ تقریب میں بھارتی وزیر دفاع راجناتھ سنگھ، ان

کی فرانسیسی ہم منصب فلورینس پارلی اور چیف آف ڈیفنس اسٹاف بپن راؤت سمیت بھارتی فضائیہ کے سربراہ موجود تھے۔اس موقع پر وزیر دفاع راجناتھ سنگھ نے ’’خیال چودھری ‘‘ بن گئے اور لداخ میں چین کے ساتھ موجودہ کشیدگی کی طرف اشارہ کرتے ہوئے کہا کہ سرحد پر جو حالات ہیں، یا کہیے جو حالات بنائے گئے ہیں، اس مناسبت سے بھارتی فضائیہ میں رافیل جنگی طیاروں کی شمولیت بڑی اہمیت کی حامل ہے۔ رافیل جیٹ گیم چینجر ثابت ہوں گے۔انہوں نے بھارتی فضائیہ کی تعریف کرتے ہوئے پاکستان کے ساتھ سنہ 1965 کی جنگ اور کارگل کا تذکرہ کیا اور کہا کہ بھارتی جنگی طیاروں نے پاکستانی ٹھکانوں کو نشانہ بنا کر ان جنگوں میں کامیابی دلائی تھی۔فرانس کی وزیر دفاع نے کہا کہ ان جیٹ طیاروں کی شمولیت سے بھارت کو اپنے حریفوں پر برتری حاصل ہوگی، اور ان سے میک ان انڈیا کو بھی کافی بڑھاوا ملے گا۔دفاعی تجزیہ کار برہماچیلانی نے کہا کہ اس میں کوئی شک نہیں کہ رافیل بہتر جنگی طیارے ہیںلیکن یہ کہنا ہے کہ ان پانچ طیاروں کی شمولیت سے چین پر بھارتی فضائیہ کو برتری حاصل ہوگئی ہے، مبالغہ آرائی ہے۔ پورے 36 رافیل ملنے کے بعد بھی بھارت کو چین سے سخت چیلنجز کا سامنا رہیگا۔