اسلام آباد( آن لائن ) بھارتی فوج کی ایک بار پھر لائن آف کنٹرول پر بلااشتعال فائرنگ،18سالہ لڑکی شہید، دو خواتین ، دو بچیوں سمیت 6شہری ز خمی ہوگئے ، پاک فوج کی بھرپو ر جوابی کارروائی ، بھارتی چوکیوں کو نشانہ بنایا ۔

ترجمان افواج پاکستان کے مطابق بھارتی فوج نے تتہ پانی سیکٹر پر شہری آبادی کو جان بوجھ کر نشانہ بنایا بھارتی فوج کی بلااشتعال فائرنگ سے فتح پور گائوں کی 18سالہ لڑکی شہید ہوگئی جبکہ دو خواتین ، دو بچیوں سمیت 6شہری زخمی ہوگئے ۔ آئی ایس پی آر کے مطابق بھارتی بلااشتعال فائرنگ کے جواب میں پاک فوج نے بھرپور جوابی کارروائی کرتے ہوئے بھارتی چوکیوں کو نشانہ بنایا ۔اس سال اب تک 1877 جنگ بندی معاہدے کی خلاف ورزیاں کی جاچکی ہیں اب تک بھارتی فائرنگ سے 6 خواتین ، 5بچیوں سمیت 15شہری شہید ہوچکے ہیں اب تک 46خواتین ،37بچیوں سمیت 144شہری زخمی ہوچکے ہیں بھارتی اشتعال انگیزی کا پاک فوج بھرپور جواب دے رہی ہے اور لائن آف کنٹرول کے دوسری طرف بھی سویلین آبادی ہونے کے باعث صرف بھارتی چوکیوں کو ٹارگٹ کرکے جواب دیا جاتا ہے ۔