اسلام آباد(مانیٹرنگ ڈیسک) لاہور کے میو ہسپتال میں زیر علاج کرونا وائرس کے 2 مریضوں نے سوشل میڈیا پر جاری پیغام میں عوام سے خصوصی اپیل کی ہے کہ وہ کرونا وائرس کو سنجیدگی سے لیں اور اس بیماری سے بچنے کیلئے احتیاطی تدابیر اور حکومت کی جانب سے جاری کردہ ایس او پیز پر عمل کریں۔

خاتون مریض کا کہنا ہے کہ اگر آپ کو اپنی زندگی سے پیار ہے تو ڈاکٹرز کی بات سنیں ان کی ہدایات پر عمل کریں۔ ہم لوگ ڈاکٹرز کی نہیں بلکہ اپنی غفلت کی وجہ سے بیماری کا شکار ہوتے ہیں۔ میں جب سے ہسپتال میں داخل ہوئی ہوں ڈاکٹرز اور طبی عملہ نے میرا ہر طرح سے علاج کیا ہے۔ خدارا ڈاکٹرز جس جس طرح ہمیں ہدایات دے رہے ہیں، ان کی بات سنیں، ہمارے لیے یہ بہت ضروری ہے، اللہ نے ان ڈاکٹرز کو ہمارے لیے مسیحا بنا کر بھیجا ہے۔جبکہ ایک اور مریض کا کہنا ہے کہ وہ لوگوں سے اپیل کرتے ہیں کہ ڈاکٹرز کا احترام کیا جائے۔ یہ ڈاکٹرز ہی اپنی جانوں کی پرواہ نہ کر کے ہمارا علاج کر رہے ہیں۔ لوگوں سے درخواست ہے کہ وہ خود سے کسی بھی دوا یا ٹوٹکے کا ہرگز استعمال نہ کریں۔ علاج کیلئے صرف اور صرف ڈاکٹرز کی ہدایات پر عمل کیا جائے۔ خاص کر سنا مکی کے استعمال سے گریز کیا جائے۔ ڈاکٹرز کی اجازت کے بنا سنا مکی کا استعمال نہ کیا جائے ورنہ اس کے استعمال سے آپ کی حالت بہت زیادہ خراب ہو جائے گی۔ سنا مکی کے استعمال سے آپ کو بار بار موشن آئیں گے اور پھر آپ اٹھنے کے بھی قابل نہیں رہیں گے۔ اس لیے خود سے ادویات اور ٹوٹکوں کے استعمال کی بجائے صرف ڈاکٹرز سے رجوع کیا جائے۔