ٹوکیو (این این آئی)جاپان میں پاکستان کے سفیر امتیاز احمد کی ہدایات کے بعد سفارتخانے میں تعینات کمرشل قونصلر طاہر چیمہ کی کوششوں سے جاپان سے پاکستان گفٹ اسکیم کے تحت بھجوائی جانے والی گاڑیوں کے لیے درکار کاغذات اور شرائط میں زبردست نرمی کردی گئی ہے۔گفٹ اسکیم سرٹیفیکیٹ کی تیاری کے لیے جاپان میں مقیم پاکستانیوں کو ایک ایک ہفتہ لگ جایا کرتا تھا اور درجنوں کاغذات کی ضرورت ہوا کرتی تھیں،
تاہم سفیر پاکستان امتیاز احمد کی جانب سے کمیونٹی کو درپیش مشکلات کے کے پیش نظر کمرشل قونصلر طاہر چیمہ کو گفٹ اسکیم سرٹیفیکٹ کا عمل آسان تر بنانے کی ہدایات کے بعد طاہر چیمہ نے پاکستان میں وزارت کامرس، ایف بی آر اور کسٹم حکام سے طویل مذاکرات کے بعد صرف پانچ اہم دستاویز کی فراہمی تک محدود کردیا ہے۔اب پاکستان گفٹ اسکیم اور دیگر سہولیات کے تحت گاڑیاں بھجوانے والے اوورسیز پاکستانیوں کو اپنا اوریجنل پاسپورٹ، شناختی کارڈ، گاڑی کا اصل ایکسپورٹ سرٹیفیکیٹ، بل آف لینڈنگ اور گفٹ انڈرٹیکنگ جمع کرانا ہوگا جس کے بعد ان کاغذات کی جانچ پڑتال کے بعد اوورسیز پاکستانی کو گفٹ اسکیم سرٹیفیکیٹ جاری کردیا جائے گا۔اس حوالے سے سفارتخانہ پاکستان میں تعینات کمرشل قونصلر طاہر چیمہ نے کہا کہ سفیر پاکستان امتیاز احمد کی ہدایات کے پیش نظر ہم نے کوشش کی ہے کہ کمیونٹی کو زیادہ سے زیادہ سہولیات فراہم کی جائیں اور ان کو درپیش مشکلات کا خاتمہ کیا جائے،ان ہی میں سے ایک مشکل گفٹ اسکیم سمیت دیگر اسکیموں کے ذریعے پاکستان گاڑی بھجوانے کے لیے بے جا اور غیر ضروری کاغذات کی فراہمی کی شرائط ختم کرتے ہوئے اب طریقہ کار کو آسان کردیا گیا ہے، امید ہے اس عمل سے نہ صرف اوورسیز پاکستانیوں کو فائدہ پہنچے گا بلکہ حکومت کو بھی ڈیوٹی کی مد میں زرمبادلہ حاصل ہوگا۔
